Wakiilka Qaramadda Midoobay Nicholas Haysom ayaa sheegay inay soo gaareen eedeymo ku saabsan in ciidamada ay taageerto UN-ka ay ku lug yeesheen xarigii Mukhtaar Roobow iyo dhimashada 15 qof oo shacab ah maalmihii 13-15-ka December, xariga 300 qof oo u badan caruur xabsiyada lagu hayey muddo ka badan 48 saacadood.

Waxaa qoraalka wakiilka UN-ka lagu caddeeyay in Midowga Yurub, Germany iyo UK ay joojiyeen taageeradii ay siin jireen Booliska Koonfur Galbeed, taasoo ay sabab u tahay sidii ay ciidamadaasi u dhaqmeen iyo hadalkii saxaafadda lagu baahiyey ee kasoo yeeray Taliyaha Booliska Komfur Galbeed.

Dowladda Soomaaliya ayaa laga dalbaday inay ka jawaabto su’aalo dhowr ah oo ku saabsan sharcinimada Xariga Mukhtar Roobow iyo dhimashada dadka gaaraya 15-ka qof ee lagu dilay magaalada Baydhaba, wuxuuna dalbaday in baaritaan buuxa lagu sameeyo wixii ka dhacay Baydhaba.

Aqoonyahano u dhashay Koofur Galbeed ayaa dacwad u qoray dowladaha taageera Ciidanka Somalia, waxaana dhinaca kale jira dacwad loo gudbiyay maxkamadaha Yurub iyo Mareykanka.