ERIGA NUUX TAANI Ma dalabkii Salaadiinta Awdal Baa Mise Madaxweynuhu Wuxuu ku Helay Raad Cad..!

12 December 2011 Waagacusub.com-Inkastoo Madaxweynuhu awood sharci u leeyahay xil-ka-qqadista iyo Magacaabista masuuliyiinta qaranka, hadana taa micnaheedu maaha in shuruucda iyo xeerarka dalku Madaxweynaha u jideeyeen inuu sifaha uu doono ugu takri-fali karo awoodaha aynu kor ku soo sheegnay ee Distoorku siiyey. Tusaale ahaan haddii ay dhacdo inuu Madaxweynuhu eryo masuul qaranka xil hayey, waxa waajib ku ah Madaxweynaha inuu bulshada u caddeeyo sababta keentay xil-ka-qaadistiisa, sidoo kale taa bedelkeeda marka uu masuul cusub u magacaabo jago, waxa iyana ku waajibtay Madaxweynaha inuu shacbiga ku wargeliyo waxyaabaha uu ku doortay.

Taa micnaheedu maaha in Madaxweynuhu ka amar-qaato shacbiga la’aantoodan aanu waxba samayn karin, haseyeeshee mihiimada taa looga jeedaa waxay tahay Kow in aanu tacadi dhicin oo Madaxweynuhu qofkuu doonana eryin kuu doonana xil ugu dhiiban. Tan labaad oo ah arinta ugu mihiimsani waxay tahay in bulshadu hesho war sax ah oo xaqiiqo ah, isla markaana ay meesha uga baxaan wararka beenta ah iyo sheekooyinka dacaayada ah, kuwaasoo haddii ay ka xoog bataan xaqiiqada ay dhici karto inay lunto kalsoonidii bulshadu ku qabtay Madaxweynaha, taasoo sababi karta in la waayo dhammaan waxyaabihii aasaasiga ah oo dhan ee bulshada isku hayey, sida nabadgelyada, kala danbayntii iyo jiritaanka Qaranimo.
Haddabaa, marka uu sidaa u cad yahay nidaamda sharci ee Madaxweyneyaasha dunidu ku shaqeeyaan, ayaa sidii laf-dhuun-gashay oo kale waxa bulshada reer Somaliland ka daadegi-weyday amarka aan sababta lahayn ee Madaxweynaha Somaliland Md. Axmed Siilaanyo xilkii kaga qaaday Taliyihii Ciidanka Qaranka Md. Nuux Taani, iyadoo sidoo kalena, ay jiraan warar iyo sheekooyin faro-badan oo u baahan in si dhab ah loo kala caddeeyo RUN iyo BEEN midka ay yihiin, kuwaasoo haddii aan sidaa la yeelin sababi kara kala shaki bulshada dhexdeeda ku yimaada iyo in si dhib yar loo laayo shaqsiyaad Qaranka ku culus oo aan wax dembi ah lahayn, balse dacaayado iyo sheekooyin BEEN ah oo laga faafiyey dartooda loo tuhunsan yahay inay geysteen falal dil ah, sida dhacdadii dhowaan ka dhacday deegaanka SAAMEEL ee lagu laayey dadka rayidka ah oo iyaga lafdigoodu aan waxba galabsan, isla markaana aanay jirin cid ilaa iyo hadda Xukuumadu sheegatay inay falkaa geysteen oo la hayo.
Wararka iyo sheekooyinka aan kala cadayn ee bushadu isla dhexmaraysay dhawrkii maalmood ee u danbeeyey, qaarkood-na shaqsiyaad waa weyn oo reer Somaliland ahi ku faafiyeen Warbaahinta Maxaliga ah, ayaa tilaamaamaya in Taliyaha Ciidaanka Qaranka ee Madaxweyne Siilaanyo Shalay xilka ka qaaday uu lug-weyn ku lahaa dhacdadii ka dhacday deegaanka SAAMEEL. Taa micnaheedu maaha maxa xilka looga qaaday Taliyihii Ciidaanka, balse arinka meesha ku jiraa waxa uu yahay maxaa lagu eray Nuux Taani. Waa su’aal runtii qofkastoo reer Somaliland ah uu maanta isweydiinayo.

Sidoo kale, maaha ceeb in qof xil Qaran haya la eedeeyo ama loo tuhmo inuu ku lug lahaa dhacdo markaa taagan, balse sida sharcigu dhigayo masuulka la soo eedeeyey waxa xaq loogu leeyahay in hay’adaha baadhistu ay waajibkooda ka gutaan, isagoo xilka haya markaa kadib haddii wax ku cadaadaana XISAANANDA ama xilka uu hayo laga qaado si Maxkamad loo horgeeyo go’aan ka gaadha arinkiisa, haddii lagu waayana uu waajibka Qaranku u igmaday u sii guto.
Soomaalidu waxay ku maahmaahdaa “..Sacabka hadaan xeeladi ku jirin maxaa habeenkii loo tumaa..”. Taa waxaan maanta ka dhigan eriga Nuux Taani oo runtii ah mid madmadow faro-badani ku shaqlan yahay una baahan in si dhab ah oo kala caddeyo si ay meesha uga baxaan sheekooyinka mala’awaalka ah ee bulshada lagu dhego-barjeeyay.
Geesta kale, dad qaarkood ayaa fikrad taa ka duwan ka aaminsan eriga Nuux Taani, isla markaan u arka go’aan Madaxweyne Siilaanyo uga faa’iideystay qaab-siyaasadeed, kaasoo uu ugu talo-galay inuu ku shaafiyo beelihii dhibaatadu ka soo gaadhay deegaanka SAAMEEL, kadibna markuu isu-gee-geeyay talooyin ay usoo jeediyeen qaar ka mid ah Salaadiinta reer Awdal iyo hadalo dhawr jeer Warbaahinta ay ku shaaciyeen Odayaal-dhaqameed iyo shaqsiyaad reer Awdal ah, kuwaasoo marka la isku soo xooriyo nuxurka hadaladoodu ahaayeen in xilka laga qaado Taliyaha Ciidaanka Qaranka.
Si kastaba xaalku ha ahaadee, waaxa Madaxweyne Siilaanyo looga fadhiyaa oo shavcbigu ka sugayaan inuu u kala caddeeyo Laba qodob midka eriga Nuux Taani yahay. Kow ERIGA NUUX TAANI Ma Aqbalada Dalabkii Adkaa ee Salaadiinta Awdal Baa, Mise Madaxweynuhu Wuxuu ku Helay Raad Cad..!.

Xilalka Wasaaradda Maaliyadda oo Dhinac ka Raran + Diidmada Baadhitaanka Hanti Dhawrka iyo Kordhinta Cashuuraha Sharci Darrada

Maxaa u Dammaanad ah Cashuur-Bixiyeyaasha MEHERADAHA in Lacagta uu Bixiyey Gaadhayso Khasnadda Dawladda Dhexe..?
Qaybtii 2-aad
Hargeysa(Yool)-Dakhliyada shaqada lagu kasbaday waxa ka mid ah mushaharka, Lacagaha hawlgabka, gunada (Tusaale gunooyinka caadiga ah, sida guryaha shirkaduhu dadka siiso).
Cashuurtani waxay ku waajibaysaa marka la qiyaaso caddadka dakhliga inta uu leeg yahay haddii aan ganacsaduhu ama shirkaddu gaadhinin inta qiimaha cadaddka dakhliga ay cashuurtu ka baxayso uu ka hooseyo qiyaastii la rabay laguma laha wax cashuura .
Canshuurta qiimaha la socota (Value added Taxes)
Canshuurta qiimaha la socota waa canshuur sida badeecadihii loo isticmaalo, taasoo ganacsaduhu ku daro qiimaha alaabta ama adeegga uu iibinayo. Ujeedadu waxa weeye in qofka alaabada isticmaalaya uu bixiyo canshuurta, maadaama ay la socoto qiimaha alaabadii uu iibsanayey.
Ganacsiga ka dhexeeya ganacsatada, ganacsadaha iibsada alaabta ama adeegga wuxuu iska jari karaa canshuurta qiimaha la socota ee ganacsadaha kale oo waajibaadka Canshuuraha leh uu isaga ku soo dalacay, sidaa ayaa la samayn karaa haddii sheyga loo adeegsanayo ganacsi leh canshuurta qiimaha la socota. Waajibka canshuurta qiimaha la socota waxay saaran tahay dhammaan dadka ganacsi ahaan u iibiya badeecooyinka ama adeegyada. Iibinta adeegyada tusaale ahaan, waxa ka mid ah adeegyadda hudheeladda kuwa cuntodda sameeya iyo kuwa Hurdaddaba iyo adeega Isgaadhsiinta, Xawaaladaha, Kaalmaha Shiidaalka iyo adeegyadda kale alaab qaadista. Cashuurta noocan ah waxa ururiya ganacsadaha ama shirkadda oo Xisaab-xidhka ka dib, waxa uu geeya xafiiska cashuuraha.”.
Haddaba marka la doonayo in hawsha aynu ka sheekaynay laga hirgeliyo dal sideena oo kale, isla markaan la rabo inay hawsha baaxaada leh ay fuliso Wasaarad ama mid ka mid ah hay’adaha dawladu leedahay, maxaa looga baahan yahay inay marka hore la timaado si ay unoqoto mid ku filan baaxada hawlaha laga sugayo.
Markale waxaanu su’aasha usoo bandhignay mid ka mid ah aqoonyahanada reer Somaliland ee khibrada-weyn u leh arimaha dhaqaalaha iyo maaulka, kaasoo codsaday in aan magaciisa la sheegin sababo badan awgood. Ugu horayn waxa aqoonyahanku jawaabta su’aasha ku soo ururiyey laba qodob, kuwaasoo kala ah Kow in Wasaarada ama hay’adda hawsha fulinaysa dhexdeeda uu ka jiro nidaam ku salaysan caddaalad, isla markaana gudaheeda ama Waaxyaha ay ka kooban tahay yihiin kuwo ay ka hawlgalaan shaqaale aqoon iyo waayo-aragnimo fiican u leh hawsha. Sidoo kalena waa inuu jiro isku dheeltirsanaan, gaar ahaan qaab-dhismeedkooda si ay u noqdaan kuwo isdheelitira xagga shaqada.
Waxa kaloo aqoonyahanku timaan-dheer ka bixiyey qodobka Labaad oo runtii uu ku sifeeyay kan ugu miihimsan marka loo eego hawsha aynu hirgelinteeda ka hadlayno. Tusaale ahaan waxa uu xusay marka la doonayo in Cashuur laga qaado qof iibsade ah, lacagtaasina ay noqoto mid dawlada dhex marka danbe kula xisaabtanto Meheradaha noocay doonaan ha noqdaane, waxa aqoonyahanku hoosta ka xariiqay laba arimood, kuwaasoo kala ah Kow qaab ama nidaam noocee ah ayaa Wasaarada Maaliyaddu kula xisaabtami kartaa, ama’se ku ogaan kartaa inta shay ee Meherad walba laga iibsaday ama inta Qado ee laga cunnay, sidoo kale waxa uu sheegay haddii aanu jirin wax-soo-saar dalku leeyahay, sidaa awgeed-na badeecadaha wadanka gudihiisa lagu isticimaala yihiin kuwo dibedda laga keeno, kuwaasna sida aynu wada ognahay lagu soo Cashuuro Kastamadda ku yaal goobaha ay ka soo degaan sida Berbera, Lawyo-cado iyo Wajaale oo kale.
Inta aynaan gudo-gelin faahfaahinta arimaha aynu ka soo hadalnay, waxa xusid mudan inagoo maanka ku hayna ujeedada maqaalkeena oo ah mid ku taxaluqa hab-dhaqamada iyo qaab-dhismeedka Wasaarada Maaliyadda Somaliland iyo hannaanka ay u socdaan hawlaheeda shaqo, gaar ahaan cahdiga isbedelka hoggaanka cusub.
Wasaarada Maaliyaddu waxa qaranka u qabilsan tahay inay qaabayso guud ahaan dhaqaalaha iyo Maaliyadda dalku leeyahay, sidoo kale waxay Xukuumadda ka caawisaa qorshaha lagu jangoynayo Miisaaniyadda-sannadeedka dawlada ee sannadlaha ah iyo waxyaabo kale oo aad u tiro badan.
Haddaba marka shaqada Wasaarada Maaliyaddu tahay sidaa aynu kor ku soo sheegnay. Waxa xusid mudan Wasaaradda Maaliyadda Somaliland ma tahay mid ku shaqaysa nidaamadan aynu ka soo sheekaynay, sidoo kale, ma tahay Wasaarada hawlawadeenada ka shaqeeya lagu soo xusho aqoon iyo waayo-aragnimada ay u leeyihiin hawlaha Wasaarada. Haddii aynu isdul-taagno jawaabta su’aashan Wasaarada Maaliyadda Somaliland ee uu Wasiirka ka yahay Maxamed Xaashi Cilmi, waxay ka kooban tahay:
Ø Agaasimaha Kastamadda
Ø Waaxada Qorshaynta oo runtii marka loo eego dunida kale ah waax aan si cad loo fahmi karin shaqadeeda, maxaa yeelay inta badan Wasaaradaha dalalka dunida, waxay leeyihiin Waaxda Miisaaniyadda oo ah tan u dhiganta qorshaynta
Ø Waaxda Miisaaniyadda
Ø Waaxda Maamulka iyo Lacagta
Ø Waaxda Hanti/dhawrka, oo iyaduna ah mid ku cusub qaab-dhismeedka Wasaaradaha Maaliyadda ee Caalamka, sababtoo ah Wasaarada M,aaliyaddu waxay qaranka u qaabilsan tahay qaanbaynta dhaqaalaha iyo Maaluiyadda dalka, sidaa darteed waxay mudan tahay in mar walba la baadho in musuqmaasuq ka jiro iyo inkale, haseyeeshee awood uma laha inay iyadu is-baadho, taasi waxay la mid tahay Gabaygii Marxuun Ibnaraahin Gadhle ee “..TUUG-TIRIIG-SITA..”.
Ø Waaxda Cashuuraha
Ø Maamulaha Kastamka Caynabo
Ø Maamulaha La’aanta Beer
Ø Maamulaha Kastamka Berbera
Ø Maamule-ku-xigeenka Koowaad ee Kastamka Berbera
Ø Maamulaha Cashuuraha Beriga Berbera
Ø Maamuleyaasha Kastamadda Hargeysa
Ø Maamulaha Kastamka Wajaale
Ø Maamulaha Kastamka Kalabaydh
Ø Maamulaha Cashuuraha Beriga Hargeysa
Ø Maamulaha Kastamka Alaybaday
La Soco Caddadka Danbe..

Waa Kuma Taliyaha Cusub ee Ciidanka Qaranka Somaliland loo Magacaabay
Mujaahid Maxamed Xasan Cabdilaahi (Jidhif), waxa uu kasoo qalin jabiyay akadamiyada Ciidamada Milatariga oo wax kusoo b artey Mosco Acadamic Millatry University, waxaanu takhasus gaar ah u heystaa qeybta Engineeringka, waxa uu Taliye kasoo ahaa Qeybtii lix labaatnaad ee Ciidanka Xooga Soomaaliya qeybta Dhismaha, waxa kale oo uu Hogaamiye ka ahaa qeybta Sahanka Hay,adii Mareykanka ee Baadhista Shidaalka iyo Macdanta ee (Shafaron), waxaanu xiligaa mudo badan ku sugnaa Xeebaha Galbeed ee Somaliland oo ay intooda badan Sahan dheer ka qaadey Hay,adaasi.
Mujaahid Maxamed Xasan Cabdilaahi (Jidhif), waxa Dowladii Maxamed Siyaad Barre u taxaabtey Xabsiga dabyaaqadii 1988-kii, isagoo isla Sanadkaa 1988-kii dabayaaqadiisii kasoo fakaday Xabsi kuyaala Gudaha Magaalada Muqdisho, waxaanu usoo Gudbay Taliskii Ciidanka Xooga SNM ee Balligubadle halkaasoo uu markiiba usoo weydaartey dhinaca Xeebaha Galbeed oo uu hoggaamiye u noqday Ciidankii adkaa ee Guutadii 99-kii SNM oo uu Taliye u ahaa ilaa dabayaaqadii Sanadkii 1991-kii xiligaas oo ay dagaal qadhaadh wada galeen oo dhinaca khibrada Ciidanka ah Ciidankii uu Watey Cabdicasiis Cali Bare, Waxaana bilowgii Xukuumada Somaliland ee xiligii Madexweynihii u horeeyay Cabdiraxmaan Axmed Cali loo magacaabay Taliyaha Ciidanka Nabedgelyada Somaliland, oo uu ku guulaystey in uu horaantiiba nabedgelyada gacanta ku dhigo Gudaha Magaalada Hargeysa ee Caasimada ah, waxa xilkaa u xigay in Sanadkii 1993-kii xiligii Xukuumadii Madexweyne Marxuum Cigaal loo Magacaabay Taliye Xigeenka Ciidanka Bilowga Somaliland, oo uu aasaaskii Ciidamada Booliska iyo Nabedgelyadaba kasoo qaatey door weyn isagoo mudo badana kusime ka ahaa Taliyaha Ciidanka Booliska maadaama, Cabdi-Dhiboo inta badan fasax ku maqnaa oo aahaa Taliyhii Ciidanka Booliska Somaliland.
Sanadkii 1995-kii waxa uu Madexweynihii Somaliland ee Xiligaa Marxuum Maxamed Xaaji Ibraahim Cigaal u Magacaabay Mujaahid Maxamed Xasan Cabdilaahi (Jidhif), Agaasimaha Guud ee Wasaarada Macadanta iyo Biyaha oo iyana kasoo qaatey door badan, waxaana sanadkii 1999-kii ka baxasadey Wasaaradaas Wasiirkii Wasaarada Macadnta iyo Biyaha Baashe waxaanu ku simay mudo badan xilkaas.
Mujaahid Maxamed Xasan Cabdilaahi (Jidhif), Xukuumadii Madexweyne Rayaale waxa y u magcowday Guddoomiyaha Hay,ada Miino Saarka Qaranka, xilkaas oo uu mudo hayay,Waxa kale oo uu Xilal kasoo qabtey Hay,ado ay kamid Yihiin Hay,ada Danish Demaning Group, waxa kale oo uu lataliye dhinaca Ciidamada ah ka ahaa mudo kooban Saraakiisha Badacas ee Ciidamada Mareykanka.
Warsaxaafadeed

Hargeysa(Yool)-Madaxweynaha Jamhuuriyadda Somaliland Md. Axmed Siilaanyo, ayaa markii ugu horeysay xil-ka-qaadis ku sameeyay Taliyihii Ciidaanka Qaranka Nuux Taani

“..Madaxweynaha JSL, Mudane Axmed Maxamed Maxamuud (Siilaanyo) waxa uu maanta [Shalay] Digreeto Madaxweyne Xilalkii kaga Qaaday Taliyihii hore Ciidamada Qaranka Jamhuuriyadda Somaliland iyo Hogaanka Hawl-gelinta Ciidanka Qaranka, isla markaana waxa uu Madaxweynuhu xilalkaa u magacaabay Taliye Cusub iyo Hogaan.
Madaxweynuhu:-
Markuu Arkay: Qodobka 90aad ee Dastuurka Jamhuuriyadda Somaliland;
Markuu Arkay: In baahi loo qabo in la dardar geliyo hawlaha Ciidanka Qaranka;
Markuu Tixgeliyey: La tashiga Madaxda ay Arrintani khusayso;
Markuu Arkay: In uu hanan karo xilkan loo magacaabay;
Wuxuu go’aansaday;
In uu xilalkii ka qaado Taliyihii hore ee Ciidamada Nuux Ismaaciil Taani, iyo Hogaanka Hawl-gelinta Ciidanka Qaranka JSL, Xasan Cabdi Yuusuf (Xasan Keyse)
Waxaanu uga mahad naqay mudadii ay xilalkan u soo hayeen, hawshii ay qaranka u soo qabteen.
Sidoo kale Madaxweynuhu isaga oo sunaha Dawladnimo fulinaya waxa uu magacaabay Taliyaha Cusub ee Ciidanka Qaranka JSL oo laga bilaabo maanta noqonaaya Maxamed Xasan Cabdilaahi (Jidhif)
Sidaa si la mida waxa uu Madaxweynuhu xilkii ka qaaday hogaankii Hawl-gelinta ee ciidanka Qaranka Jamhuuriyada Somaliland Xasan Cabdi Yuusuf (Xasan Kayse)
Waxaanu magacaabay Hogaanka Cusub ee Hawl-gelinta Ciidanka Qaranka Jamhuuriyada Somaliland, Maxamed Aadan Saqadhi (Dabagale)
Madaxweynuhu waxa uu Digreetadan ku Amray Wasiirka Gaashaandhiga iyo La-taliyaha Arrimaha Gaashaandhiga ee Madaxweynaha in ay Saraakiishaa Xilalka ugu kala wareejiyaan Sida ugu dhakhsaha badan…”.
Is Rasaasayn Taleex ku Dhex Martay Ciidamada Puntland Kuwa Deegaanka
Taleex(Yool)-Wararka ka imanaya degmada Taleex oo ka tirsan Gobolka Sool ayaa sheegay in ugu Yaraan hal qof uu ku dhintay iyada oo saddex kalen uu dhaawaca soo gaadhay ka dib markii ay weerar ku soo qaadeen ciidamada Puntland galabta degmada Taleex.
Wararka laga helayo deegaankaasi ayaa sheegaya in Magaalada ay ka dhacday rasaasayn xoog leh oo dhexmartay ciidamada ka yimid dhanka Puntland iyo ciidan beeleedyo ku sugnaa Magaalada Taleex,goobjoogayaal ku sugan halkaas ayaa xaqiijiyey in shacabku ay gadood ka muujiyeen maleeshiyada ku soo duushay dhulkooda.
Ma jirto ilaa hada cid ka hadashay Weerarkan oo ka tirsan masuuliyiinta labada dhinaca ee Somaliland iyo Puntland lamna garanayo sababta dhabta ah ee ka dambaysa israsaasaynta maanta ka dhacday degmada Taleex oo ay gacanta ku hayaan ciidan beeleed ka amar qaato odayaasha dhaqanka ee deegaankaas.
Ciyaaryahanadda Gobolka SANAAG oo Cidhiidhi Geliyey Xulka MAROODI-JEEX
Burco(Yool)-Tartanka ciyaaraha gobolada Somaliland oo maraya gabagabada wareegii hore kana socda garoonka Alamzey Stadium ee Burco, ayaa waxa foodda is-daray gogolada Maroodijeex iyo Sanaag.
Ciyaartan oo ahayd mid xamaasadeedu aad u sarraysay, ayaa labadan xul ee wada dheelayay galabta waxay ka wada tirsan yihiin Group ka A. Labadan xul ee gobololada Maroodi-jeex iyo Sanaag, ayaa kama dambaystii ciyaarta ku kala baxay barbar-dhac 1:1
Sida oo kale Ciyaartoyga Axmed Siciid Cawad oo ah Captain ka Kooxda Sanaag ayaa la siiyey Kaadhka Cas ciyaartana Dibada looga Saaray.
Ciyaartan ku soo Gabagaboday barbar-dhaca, ayaa waxa Semifinal-ka u baxay Gobolka MaroodiJeex Halka Gobolka Sanaag na Tigidhka u goostay Ceerigaabo isaga oo labeeyey Xulka martida loo yahay ee Togdheer oo isna Ciyaarha uga hadhay una soo gudbin Semifinal ka waxaana
Wararka Dibedda
Barakac Cusub oo ka Bilowday Baardheere ee Gobolka Gedo
Baardheere(Yool/Wakaaladaha)-Kadib marki laba jeer ay duqeeyeen mudo sadex maalin gudaheed ah diyaaradaha dagaalka Kenya ayey bilaabeen dadka ku nool magaalada Baardheere in ay barakacaan.
Sida ay sheegayaan wararka aanu halkaasi ka heleyno, xalay iyo saakay waxaa jiray barakac ay sameynayeen qoysas badan oo ka mid ah dad deegaanka kuwaasi oo ka cabsi qaba in mar sadexaad ay duqeyaan diyaaradaha dagaalka Kenya.
Qof diiday in aanu magaciisa shaacino oo ka mid ah waxgaradka degmada Baardheere ayaa Horseed Media u sheegay in uu ciyaalkiisa kala baxay magaalada isla markaana uu geeyey baadiyaha magaalada Baardheere.
“..Qoysas badan ayaa saakay u barakacay tuulooyinka jaarka la ah magaalada, dadka waxay ka baqayaan duqeymo kale, runti aad ayaan uga wal walsanahay duqeymahan waxaana dhihi karnaa waa wax ka baxsan bani,aadanimada, mar alaale iyo marki ay ciyaarla iyo haweenka maqlaan guuxa diyaarado way argagaxayaan waxana ay leeyihiin inkaar qabtadi ayaa soo socota..”. Sidaa waxaa yiri qof ka mid ah dadka deegaanka oo aan qadka telfoonka kula xiriirnay.
Laba diyaaradood oo ahaa kuwa miiga loo yaqaano oo ay leedahay dowlada Kenya ayaa shalay duqeeyey magaalada Baardheere, mid ka mid ah gantaaladi ay tuurtay oo ku dhacay xarunta Bisha Cas ee magaalada Baardheere ayaa waxaa ku dhaawacmay qof rayid ahaa.
Waxay aheyd duqeynti labaad oo ay diyaaradaha dagaalka Kenya ka geysaan Baardheere, Khamiisti lasoo dhaafay ayey sidaan oo kale u duqeeyeen waxaana ku dhintay hal ruux.
Magaalada Baardheere ayaa ka mid ah 10 Magaalo uu bishi hore Afhayeenka Milatariga Kenya sheegay in ay duqeyn doonaan.
Fariimaha

Ciyaaraha
Musharaxiinta Abaalmarinta Laacibka Sannadka Ee Ugu Xun Serie A Bidone d’Oro Oo Lagu Dhawaaqay
Saed Mohamed Balaleti
11ka musharax ee abaalmarinta Bidone d’Oro oo lagu dhawaaqay, waa abaalmarinta ciyaaryahanka ugu xun sannadka.
Abaalmarinta ayaa waxaa u codeeya taageerayaasha kubada cagta Talyaaniga ee barnaamijka Radio 2 ee Catersport.
Musharaxiinta sannadkan waxaa ka mid ah Amauri (Juventus/Parma), Felipe Melo(Juventus), Eduardo (Genoa), Milos Krasic (Juventus), Diego Milito (Inter), Adrian Mutu (Cesena), Santiago Silva (Fiorentina), Mauro Zarate(Lazio/Inter), Luca Toni (Juventus) iyo Diego Forlan (Inter).
Abaalmarintan oo sidoo kale loo yaqaano Golden Bin ayaa waxa ay lidi ku tahay Ballon d’Or, waxaana ragii hore ugu guuleystay ka mid ah Adriano iyo Ricardo Quaresma.
Inkastoo abaalmarinta loogu talo galay ciyaaryahanka sannadka ee ugu xun, ‘Bidone’ sidoo kale waxa ay la micno tahay heshiiskii ugu xumaa ee xiddig lagu soo iibsado.
Waana sababta Amauri iyo Forlan loogu soo daray, Amauri ayaan Juventus u ciyaarin xilli ciyaareedkan oo dhan, halka Inter ay xilli danbe ogaatay in Forlan uusan u ciyaari karin Champions League.
Hadaba yay kula tahay in abaalmarintan uusan cidna kor u qaadi doonin balse la magacaabi doono kaliya uu ku guuleysan.
Chelsea Oo Gacanta Ka Taagatay Dalabka Ciyaarahanada Luka Modric Iyo Gary Cahill
Saed Mohamed Balaleti
Tababare Andre Villas-Boas ayaa shaaca ka qaaday in Chelsea aysan dalban doonin bisha Janaayo marka suuqa kala iibsiga ciyaartoyda uu furmo laacibiinta Gary Cahill iyo Luka Modric.
Suuqa ayaa furmi doona seddex isbuuc ka dib, lakiin tababaraha Blues ayaa sheegay inuu ku qanacsan yahay kooxda uu haatan heysto, inkastoo ciyaartoy dhowr ah lala xiriiriyay.
Mid ka mid ah ciyaartoydaas lala xiriiriyay waxaa ka mid ah Gary Cahill oo qanadaraaskiisa kooxda Bolton uu dhacayo xagaaga soo socda.
25 jirkaan ayaa si xoogan loola xiriirinayay Arsenal iyo Tottenham, lakiin Villas-Boas ayaa haatan meesha ka saaray xanta ku saabsan in ciyaaryahankaasi uu ku sii jeedo Stamford Bridge.
“Waa ciyaaryahan fantastik ah sababtoo ah waxa uu u ciyaaraa xulka qaranka England, waa daafac dhexe oo tayo fiican leh” ayuu AVB u sheegay Sky Sports.
“Sannadkii hore xilli ciyaareed fiican ayuu la soo qaatay kooxdiisa iyo wadankiisa. Lakiin ma ahan ciyaaryahan aan dooneyno ama aan ku fekereyno”
Ciyaaryahan kale oo uu meesha ka saaray 33 jirkaan ayaa ah kubad sameeyaha Tottenham Luka Modric, kaaso Chelsea ay xagaagii dhowr jeer dalbatay.
“Michael Essien ayaa inoo soo laabanaya, waxaan qabaa inaan u baahneyn hubaashii” ayuu yiri.
Chelsea ayaa sidoo kale lala xiriiriyay ciyaaryahanka FC Porto Alvaro Pereira, oo uu Villas-Boas macalin u soo ahaa.
Waxaa la rumeysan yahay in kooxda reer Portugal ay diiday dalabkii Chelsea ee 26 jirkaasi reer Uruguay xagaagii, lakiin tababaraha ayaa sheegtay inuu ku faraxsan yahay ciyaartoyda uu haatan heysto.
“Uma maleynayo inaan dalbaneyno marka la fiiriyo qiimaha, iyo sababtoo ah maba raadineyno. Waan ku qanacsanahay ciyaartoyda aan heysano..
Roberto Mancini oo Go’aan Khaladan Ku Tilaamay Go’aankii City Iskaga Fasaxday Daniel Sturridge
Tababare Roberto Mancini ayaa sheegay in Manchester City ay qalad ku laheyd in Daniel Sturridge ay ogolaato inuu kooxda ka tago.
Weeraryahankan da’da yar ayaa ka tagay City oo ku biiray Chelsea 2009kii ka dib markii la sheegay in tababarihii waagaas Mark Hughes uu diiday inuu bixiyo mushaharka tirada badan ee uu ciyaaryahanka doonayay.
Ka dib amaah uu ugu maqnaa Bolton, 22 jirkaan ayaa haatan boos ka helay kooxda Chelsea, waxaana gool uu dhaliyay seddexdii kulan ee ugu danbeysay ee Premier League uu ka soo muuqdo.
Lakiin Mancini ayaa sheegay in hadii uu xilligaas macalin kooxda u ahaan lahaa inuusan fasaxeen ciyaaryahanka da’da yar.
“Waa wax la yaab leh sababtoo ah Sturridge waxa uu ku soo barbaaray akadeemiga Manchester City, qof ayaana iska fasaxay” ayuu Macini sheegay sida ay qortay Mail on Sunday.
“Hubaashii waxa uu ka mid ahaa ciyaartoyda da’da yar ee ugu fiican City. Cidna kuma adkeyn inuu arko inuu yahay ciyaaryahan fiican”
“Hadii Sturridge uu maanta halkaan joogi lahaa, waxa uu ka mid ahaan lahaa kooxda koowaad ee City. Marar badan ayaan daawaday si fiican ayaana u garanayaa”
“Markii uu sannadkii hore u ciyaarayay Bolton waxaan weydiiyay sababtii uu uga tagay City”
“Waxa uu ii sheegay inuusan ogeyn. Waxaa ka fiicnaan laheyd inay City amaah ku dirto halkii ay isaga dhan iska fasixi laheyd”
Daniel Sturridge ayay u badan tahay inuu kooxdiisa hore ka hor yimaado habeenka isniinta marka Chelsea ay Stamford Bridge ku qaabileyso kooxda Manchester City..

“..Dhib La’aan Ayaan Ka Badinay Real Madrid..”
Madaxweynaha Barcelona Sandro Rosell
Madaxweynaha kooxda Barcelona Sandro Rosell ayaa sheegay inay kooxdiisa ay si dhib la’aan ah kaga badisay Real Madird kulankii ay ay 3-1 kaga badiyeen xalay.
Kooxda Catalans ayaa gool looga hormaray daqiiqadii koowaad ka dib qalad uu sameeyay goolhaye Victor Valdes, iyadoo Benzema uu dhaliyay goolkii ugu dhaqsaha badnaa taariikhda Clasico, lakiin Barca ayaa la soo laabatay goolal ay kala dhaliyeen Alexis Sanchez, gool uu iska dhaliyay Marcelo iyo goolka seddexaad oo uu xaqiijiyay Cesc Fabregas.
“Inkastoo aysan habooneyn inaan sidaan iraahdo, hadana ciyaartoyda maanta dhib la’aan ayay badiyeen” ayuu Rosell u sheegay suxufiyiinta ciyaarta ka dib.
“Mar kasta waa ii farxad inaan madaxweyne ka noqdo kooxdan, lakiin haatan intaa in ka badan ayaan sii faraxsanahay. Waxaan doonayaa inaan u hambalyeeyo dhamaan taageerayaasha Barcelona”
Rosell ayaa sidoo kale difaacay qaladkii uu sameeyay Valdes bilowgii ciyaarta: “Goolka hore waxa uu ahaa mid si kama ah ku dhacay. Xilli kasta oo ciyaarta ka mid aheyd ayuu dhici karay”
“Lakiin markii aan kubada qabsanay, islamarkaana ciyaartoyda khadka dhexe ay ciyaarta koontaroolkeeda la wareegeen, waa la iska ogaa natiijada soo baxeysa”
Guushaan Barcelona waxa ay u sahashay inay isku dhibco noqdaan Los Blancos, inkastoo hal kulan u harsan yahay Real Madrid.

Daawo Video Dagaalka Muqdisho= Meydadka Al-Shabaab iyo Amisom

Dhageyso Barnaamij gaara Gabayo+Khudbado+Heeso Wadaniya

Online inta akhrisanee

--
Dahir Alasow, A senior Radio and TV journalist, a leader of a press watchdog ASOJ, the editor of waagacusub.com, and outstanding commentator with fearless check on actions of the political groups and others players through investigative journalism, plus defender of the public interest and voice to the voiceless through "the truthful tip of his truth pen"
"Tribalism provides NO shelter; it ONLY causes destruction."
"Dugsi Male Qabyaaladi Waxay Dumiso
Mooyaane" Cabdullaahi Suldaan Timacadde

http://www.dahiralasow.com
Tel: +31684863567
dahiralasow@asoj.org
dahir.alasow@mareeg.com
dahir.alasaw@raadtv.com
dahiralasow@waagacusub.com
www.waagacusub.com
www.asoj.org

By Dahir Alasow

Waagacusub is Investigative media with sense of professionalism, fearless in cultivating the truth, informative, unbiased, independent, educative, a role model and a voice to the voiceless.
By Dahir Alasow
+31684863567
Dahir.alasow@asoj.org

Hees Dhiigshiil ha dhigan Download here MP3