Wargeyska afka dheer ee Yool oo Warar iyo faalooyin xiiso badan qoray

20 November 2011 Waagacusub.com-Wargeyska afka dheer ee Yool oo Warar iyo faalooyin xiiso badan ku qoray cadadkiisii maanta,halkaan hoose ka akhri

WASIIR XIRSI oo Luqad Diblomaaasiyada ka Baxsan Kula Hadlay Safiirka Itoobiya u Jooga Hargeysa

Hargeysa(Yool)-Wasiirka Madaxtooyada Somaliland Md. Xirsi X Cali, ayaa kulan uu danjiraha dawlada Itoobiya u fadhiya Somaliland kula yeeshay xafiiskiisa, waxa uu kaga dalbaday in dowlada Itoobiya martiqaad rasmi ah u fidiso Wasiirka Duulista iyo Hawada Somaliland Md. Maxamuud Xaashi iyo arimo kale oo aad u xaasaasi ah, kuna saabsan muwaadiniin reer Somaliland ah oo ku xidh-xidhan dalka Itoobiya.

Ma jiro war faahfaahin cad ka bixinaya ujeedada dhabta ah ee kulanka iyo natiijadii uu ku dhammaaday toona oo ka soo baxay qasriga Madaxtooyada.

Haseyeeshee, sida Wargeyska “Yool” ay u sheegeen ilo-wareedyo ku dhowdhow Madaxtooyada Somaliland, waxa Wasiir Xirsi intii kulanku socday uu kala hadlay Safiirka dawlada Itoobiya u fadhiya Somaliland arimo dhawr ah oo ay ka mid yihiin in Wasiirka Duulista iyo Hawada Somaliland Md. Maxamuud Xaashi dawlada Itoobiya siiso martiqaad uu ku tago dalkooda, inkastoo aanay ilahaasi tibaaxin ujeedada martiqaadka Wasiirku ug dalbaday Itoobiya inay u fidiso Wasiirka Duulista Somaliland.

Sidoo kale waxa Wasiirka Madaxtooyadu si weyn ugala hadlay Safiirka Itoobiya muwaadiniin reer Somaliland ah oo sida ilahaasi xuseen la sheegay inay ku xidh-xidhan yihiin meelo ka mid ah gudaha dalka Itoobiya, kuwaasoo uu iyagana safiirka ku adkeeyey inay si degdeg ah usoo daayaan, isagoo dhinaca kalena, u sheegay inay dowlada Somaliland mar danbe ogollaan doonin falal noocaasi oo kale ah. Waxa kaloo, wararku intaa ku darayaan in Wasiir Xirsi intii kulanku socday uu carabka ku dhiftay arinta ku saabsan Ciidamo Itoobiyaan ah oo mararka qaarkood si sharci darro ah ku soo gala deegaano ka tirsan gudaha dalka Somaliland.

Arintaasoo Wasiirku u sheegay safiirka in Somaliland aqbali karin inay dhacdo mar danbe.Ugu danbayntiina waxa Wasiirka Madaxtooyada Somaliland uu ku dheeraaday xidhiidhka wada-shaqayneed ee ka dhexeeyay safaarada iyo Xukuumada Somaliland, kaasoo Wasiirku ku tilmaamay inuu yahay mid aan gaadhsiisnay heerkii looga baahnaa, sidaa darteed-na waxa uu safiirka ku wargeliyay inuu la yimaado wada-shaqayn heerkeedu sareeyso.

Haddaba kulankan oo dhacay Arbacadii Toddobaadkan Bishuna ahayd 16th-ka, ayaa marka dhinaca diblomaasiyada laga eego waxa uu u muuqdaa inuu ahaa mid aan noociisa oo kale hore dunida uga dhicin, maadaama danjiruhu yahay wakiil dal leeyahay, isla markaana marka uu wadanka imanayo oo oggolaanshaha siiyo Madaxweynaha uu dalkiisa tegayo ama ka shaqayn doono, sidaa darteed-na haddii ay dhacdo in Xukuumada uu dalkeeda joogay ka biyo-diido wada-shaqayntiisa, waxa xaq u leh inuu kala hadlo arimaha lagu saluugsan yahay iyo kuwa kale ee looga baahan yahay inuu ku shaqeeyo waa Madaxweynaha uu dalkiisa joogo.

Si kastaba ha ahaatee, waxa isweydiintu tahay sidee buu Wasiir ugala hadli karaa cilaaqaadka siyaasiga ah ee u dhexeeya safiir dal kale u jooga wadankiisa, iyadoo aanay jirin sababo iyo duruufo kale oo ay ka mid tahay oggolaasho ama inuu Madaxweynuhu u soo wakiisho inuu hawlaha noocaas ah kala soo hadlo waxa ku kelifay iyo wax la mid ah, balse waxa jawabta arintaasi tahay mid u taala Madaxweyne Siilaanyo oo looga baahan yahay inuu shacbiga iyo wadamada aynu deriska nahayn-ba u cadeeyo waxa ku kelifay in Wasiirkiisu ku dhaqaaqo arimaha noocaas ah.

Berbera: Ma ka Mudhay Cali Xoor-xoor

Qaybtii 2aad

Haddii aynu intaa kaga soo gudubno tilmaamaha jiritaanka mashaariicdaa ku saabsan ee Maareeyuhu siiyey Saxaafadda, bal aynu wax-yar isdul taagno xogo Wargeyska “Yool” helay oo ku taxaluqa kharshiyaadka hirgelinta mashaariicdaas ku baxay iyo jawaabta Madaxweyne Siilaanyo ka bixiyey war-bixin la xidhiidhey Guud ahaan kharshiyaadka ku baxay mashaariic laga hirgeliyey Dekedda Berbera iyo nawaaxigeeda, taasoo Maareeyuhu Madaxweynaha siiyey mar uu booqasho ku tegay Magaalada Berbera.

Mashaariicda ugu waa weyn ee laga hirgeliyey Dekedda intii uu madaxda ka ahaa Maareeyaha cusub, waxa ay u kala baxaan burburinta qaybo ka mid ah dhismaha Dekedda, dhisme cusub oo dibedda looga sameeyey kooxaha dab-demiska, iyo dhisme kale oo isagana Booliska looga sameeyey Afaafka ugu horeeya ee laga galo Dekedda, kaasoo qiyaastii masaafad dheer u jira goobta la doonayo inuu ammaankeeda sugo, sidoo kale waxa iyaguna mashaariicda cusub ee dhismeyaasha u badan ka mid ah kan KAMARADAHA 36-ka xabbo ah ee lagu rakibay Dekedda iyo goobo kale oo mihiim ah, kuwaasoo iyaga lafdigoodu aan lahayn Back-up lagula socda dhaqdhaqaaqa gaadiidka iyo shaqsiyaadka laga shakiyo. Tusaale ahaan haddii uu Gaadhi dhawr jeer soo galo Dekedda marka System-ku leeyahay Back-up waxa si dhib ya loo heli karaa gaadhiga sawirkiisa oo dhinacyo badan lagaga qabtay, waxaan si toosa looga helayaa macluumaadkaas iyo mid kale oo ka badanba barnaamujka shaqaynaya.

Haddabaa inkastoo kharshiyaadka ku baxay mashaariicdaas uu aad u kala badan yahay marka mid mid la isu dul-taago, hadana sida Maareeyuhu Madaxweyne Siilaanyo u sheegay mar uu booqasho ku tegay Gobolka Saaxil, waxa uu ku sheegay kharashka baxay mudadii uu xilka hayey 1,500,000 oo Dollarka Maraykanka ah, kharashkaasoo sida dad goob joog ahi u sheegeen Wargeyska “Yool” Madaxweyne Siilaayo aad ula yaabay baaxada kharashaadka ku baxay waxyaabo fudud ee Dekedda laga qabtay.

Haddii aynu wax yar ka iftiimino bixitaanka kharshiyaadka lagula baxay hawlahaa aynu kor ku soo sheegnay. Tusaale ahaan, burburinta iyo dib-u-dhiska qaybo ka mid ah Dekedda, waxa la xaqiijiyey in khasnada Dekedda laga qaaday intii hawshu socotay Afar jeer oo min Siddeetan Kun oo Dollar ah ($. 80,000), kaasoo markan la isu geeyo dhan $. 400,000 oo Dolarka Maraykanka ah. Sidoo kale, hawsha burburinta iyo dib-u-dhiska waxa lagu fuliyey dhul baaxadiisu gaadhayso ilaa 254-Mitir una badnaa qaybihii dawlada Ruushku dhiskeeda hirgelisay ee Dekedda.

Dhinac kale haddii aynu ka eegno fulinta mashaariicdan waxa xaq loogu leeyehey Maareeyaha Dekedda inuu si xor oo xalaal ah bulshada ugu soo bandhiggo si muwaadiniita dalka joogta uga faa’iideystaan hirgelintooda, haseyeeshee wax cad in Maareeyuhu uu si cad u garab maray ku dhaqanka shuruucda iyo xeerarka dalka u yaal, isla markaana uu awoodiisa uga faa’iideystay si khaldan oo sharciga iyo Distoorka ka baxsan, waxaana taa daliil u ah shaqsiyaadka la siiyey hirgelinta mashaariicdaas, kuwaasoo isugu jira xubno ay Maareeyaha aad isugu dhow yihiin marka laga eego dhinacyo badan. Inksatoo Maareeyuhu dhinaciisa uu markii hawshaau dhammaatay uu ku sheegay hawl fiican oo Dekeddu u baahnayd, isla markaana meelihii wax laga qabtay ay ka qurux badan yihii maanta qaybihii kale ee Dekedda.

Geesta kale, intaasuun kuma eka waxyaabaha anshaxa iyo nidaamka dawladnimada ka baxsan ee Maareeyaha Dekedda Berbera ku kacay aqoon darro iyo awood la’aan midkay doonto ha ka noqotee, waxyaabaha kale uu ku talaabsaday mudadii Shan iyo Tobanka Bilood ahayd ee uu xilka hayey, waxa ka mid ah in habayaraatee aanu shaqaalaha la siin GUNOOYINKII ay qaadan jireen muddo Kow iyo Toban Bilood ah, taasoo isku celcelis ahaan bishii noqon jirtay inta u dhaxaysa 160 ilaa 200 oo Milyan oo shilinka Somaliland ah, sidoo kale shaqaalaha ka hawlgala Dekedda 70% (Boqolkiiba Toddobaatan), ayaa waxa la siiyaa mushahaarooyiin ka hooseeya 300,000 oo Kun oo Sl Shiling ah.

Lacagaha GUNNOOYINKA ah ee ku maqan Mareeyaha Dekedda, isla markaana aan siin shaqlihii xaqa u lahaa intii uu xilka hayey, ayaa waxay hadda caga-cagynaysaa Kow iyo Toban Bilood, taasoo marka Lacga cadaan ah loo bedelo dhan 1’760’000’000/= Sl Shiling, una dhiganta $. 314’285.7 oo ah Dolarka Maraykanka.

Waxa kaloo intaa dheer isla markaana ka mid ah faddeexadaha maamul ee uu ku talaabsaday Maareeyaha Dekedda Berebera Md. Axmed Biyaha la siiyo Maraakiibta iyo weel biyoodka kale ee Dekedda ku soo xidha, kuwaasoo intii Somaliland jirtay maamulka iyo iibkooda uu gacanta ku hayey maamulka Wakaalada Biyaha Berbera, haseyeeshee intii Maareeyaha cusubi xilka la wareeegay, waxa uu si toos ah ula wareegay maamulka iyo gacan ku haynta iibika Biyaha la siiyo gaadiidka Dekedda ku soo xidha, sidoo kalena waxa uu maamuulkii Biyaha u magacaabay shaqaale cusub oo aan ka tirsanayn Wakaalada Biyaha Berbera, kuwaasoo iyagu Lacagta ka qaada Weel-biyoodka Dekedda ku soo xidha ee Biyaha doonaya.

Xubnaha ama shaqalaaha cusub ee uu hawshaa u xilsaaray oo ka kooban Saddex xubnood, ayaa sida wararku sheegayaan waxa ay kor-u-qaadeen qiimaha markii hore lagu iibin jirey Biyaha, kuwaasoo qiimaha Halka-Mitir-Kuyuub 1M-3 oo markii hore ahaa $. 3 (Saddex Doolar), hadda ka dhigay $. 6 (Lix Dolar). Lacagtaasoo Saddex Dolar-na loo shub Wakaalada Biyaha Saddexda kalena ay qaataan Wiilashaa shaqada loo magacaabay, hawlwadeenadaa idman, ayaa sida la sheegay waxay qaarkood qaraabo yihiin Madaxtooyada, halka qaar-na ay keeneen shaqsiyaad ama xubno KAADIRIINTA KULMIYE ahaa.

Biyaha oo intii ASomaliland jirtay-ba marka loo baahdo lagu geyn jiray Dekedda Booyo, maadaama aan kalsooni fiican lagu qabin shaqada Beebka Dekedda ee markii hore loogu talo galay in Biyaha Dekedda lagu geeyo sababo farsamo dartood, isla markaana uu xaaladiisa ka dayriyey Engneer-ka gaarka ah ee Dekedda Berbera, oo isagu sheegay in aan la isku halayn karin.

La Soco Caddadka Danbe..

Muuse Biixi oo u Safri Doona Gobolada Bari Iyado Xubno KULMIYE ka Tirsan ka Cudurdaaratay inay Raacaan

Hargeysa(Yool)-Guddoomiyaha Xisbiga Talada haya ee KULMIYE Muuse Biixi Cabdi, ayaa la filayaa inuu Maanta u safro Magaalooyinka Berbera, Oodweyne iyo Burco, halkaasoo uu ku tegi doono booqasho aan ujeedadeedu cadayn. Ma jiro war ka soo baxay Xisbiga KULMIYE oo si cada daboolka uga qaadaya ujeedada dhabta ah ee safarka Guddoomiyahooda.

Haseyeeshee warar Wargeyska “Yool” ka helay ilo-ku-dhow-dhow Xisbiga KULMIYE, ayaa waxay sheegayaan Guddoomiye Muuse Biixi uu booqashada safarkiisa ka bilaabi doono Magaalada Berbera ee xarunta Gobolka Saaxil, halkaasoo uu marka danbena uga sii gudbi doono dhinaca Gobolka Togdheer iyo Magaalada Oodweyne ee carunta Gobolka Daad-madheedh.

Sidoo kale, wararka naga soo gaadhay Xisbiga KULMIYE, waxa ay sheegayaan in Guddoomiye Muuse uu booqashadan ku wehelin doono Xoghayaha Ku-meel-gaadhka ah ee Xisbigu Md. Xasan Siciid Yuusuf, iyadoo wararka qaarkood sheegayaan in booqashada Muuse ayb ka cudurdaarteen dhawr xubnood oo markii hore qorshaha ugu jiray Guddoomiyaha, kuwaasoo uu ka mid yahay Xildhibaan Waabeeyo, oo sida ilahaasi tibaaxeen safar kale ugu bixi doona dhinaca dalka Jabuuti, halkaasoo uu ka mid yahay wefdi ka kooban dhawr Wasiir oo socdaal shaqo u tegi doona dalka Jabuuti.

Geesta kale, warar aanu ka helnay xubno ku dhow-dhow Guddoomiye Muuse, ayaa sheegay in ujeedad socdaalka Guddoomiyuhu inuu salka ku hayo olol-siyaasadeed oo Guddoomiyuhu ku damacsan yahay inuu dadka deegaankaa ku dhaqan inuu iskagaga soo dhaadhiciyo, iyadoo sidoo kale, uu beryahanba Xisbigab KULMIYE gudihiisa ka socday loolan siyaasadeed oo u dhexeeyey siyaasiyiinta Xukuumada qaarkood iyo xubno kale oo iyaguna ku jira Xisbiga KULMIYE laftiisa.

Si kastaba ha haatee, Toddobaadad soo socda ayaa la kala ogaan doonaa ujeedada dhabta ah ee safarka Muuse ku tegay Gobolada Bariga iyo natiijada uu kala soo noqdo, faa’iido iyo khasaare midka ay noqon doonto.

Kenya oo Markii ugu Horeysay Shaacisay Tirada Ciidamada Soomaaliya kaga Geeriyoodey

Nairobi(Yool/Wakaaladaha)-Dowlada Kenya ayaa sheegtay in 8-Askari ay kaga geeriyoodeen Soomaaliya tan iyo intii ay ciidamadeedu gudaha usoo galeen dalka Soomaaliya bartamihii bishaa lasoo dhaafay ee October.

Col. Cyrus Oguna oo ku hadlayey afka Mileteriga Kenya ayaa sheegay in howlgalada ciidamada Kenya ay ka wadaan gudaha Soomaaliya ay galaafteen nolosha 8-askari oo Kenyan ah.

Wuxuuna intaas ku daray in sadex kamid ah Askartaas ay dileen kooxo dabley ah oo hubeysan halka 5-ta kalena ay ku geeriyoodeen shil ay gashay Diyaarad nooca qumaatiga u kaca ah oo ay ciidamada Kenya lahaayeen 3-kalena uu dhaawac kasoo gaarey.

Col. Ogunya ayaa dhinaca kale sheegay in 4-jeer uu dagaal dhex maray ciidamadooda iyo kuwa xarakada Al-shabaab mudo hal asbuuc ah gudeheed , wuxuuna intaas raaciyey in ciidamada Soomaaliya ay kuwa Kenya ka caawinayaan sidii ay ugu hagi lahaayeen fariisimaha xoogaga Al-shabaab.

Waa markii ugu horeysey oo ay dowlada Kenya soo bandhigto tirada ciidamda kaga geeriyoodey dalka Soomaaliya oo boqlaal Militeriga Kenya ahi ay mudo bil ka badan ku jiraan kuwaas iyaga iyo ciidamada DKG ah ee Soomaaliya ay si wada jir ah u wadaan howlgalo ciidan oo ka dhan ah Al-shabaab.

AMISOM oo Midowga Afrika ka Dalbaday Ciidamo Hor Leh in La Keeno Soomaaliya

Muqdisho(Yool/Wakaaladaha)-Ciidamada AMISOM ee ku sugan dalka Soomaaliya ayaa ka codsaday midowga Afrika inay soo kordhiyaan ciidamada ku sugan magaalada Muqdisho.

Afhayeenka AMISOM Paddy Ankunda ayaa waxa uu sheegay in loo baahan yahay in la kordhiyo ciidamada si magaalada Muqdisho looga difaaco ciidamada Al-shabaab ee ka baxay magaalada Muqdisho.

Codsigan uu soo jeediyey Paddy Ankunda ayaa yimid kadib markii labadii habeen ee la soo dhaafay ay ciidamada ALshabaab weeraro ku soo qaadeen fariisimada ay ciidamada dowladda iyo kuwo AMISOM ku leeyihiin magaalada Muqdisho.

Paddy Ankunda oo ka hadlayay weeraradii labadii habeen ee ugu dambeysey lagu soo qaaday ayaa waxa uu ku sheegay in ay ahaayeen kuwo ay ururka Alshabaab ku doonayeen in ay ku qabsadaan magaalada Muqdisho, waxana uu afhayeenku sheegay in iskudaygaasi uu fashilmey.

Weerarada ayaa labadii habeen ee la soo dhaafay waxa lagu soo qaaday saldhigyada ciidamada ay ku leeyihiin degmada Kaaraan iyo Huriwaa ee magaalada Muqdisho.

Codsigan uu soo jeediyey afhayeenka ciidamada AMISOM ayaa waxa uu soo beegmayaa iyadoo ciidamo Itoobiyaan ah la sheegay in ay soo galeen deegaano ka mid ah gobolka Galguduud ee dalka Soomaaliya.

Magaalada Muqdisho ee caasimada dalka Soomaaliya ayaa waxaa haatan ku sugan ciidamo ka socda wadamada Uganda iyo Burundi iyadoo la filayo in dhowaan ay soo gaaraan ciidamo kale oo ka socda dalka Jabuuti.

Qabashada Sayful Islaam iyo Taariikh Nololeedkiisa oo Kooban

Sayful Islam Al-qaddafi oo ah wiil uu dhalay madaxweynihii hore ee Libya ayaa waxaa gacanta kusoo dhigay koox ka tirsan kooxihii kacdoonka ee meesha ka saaray xukuumadii uu hormuudka u ahaa keligii taliskii la diley ee Mucammar Al-qaddafi.

Kooxda Sayful Islaam qabatay oo lagu magacaabo Kacdoon wadayaasha (Zintan) ayaa shir saxaafadeed ay qabteen ka sheegay in ay gacanta kusoo dhigeen xilli uu ku dhuumaalaysanayey meel u dhow deegaanka Owbaari ee ku taala gobolada koonfurta xuduuda ay Libya la wadaagta dalalka Niger iyo Algeria.

Bashir Al-talib oo ah ninkii hogaaminayey kooxdii ciidamada ahaa ee Sayful Islam Al-qaddafi qabtay ayaa sheegay in soo qabashadiisu ay u suurta gashay kadib markii ay heleen xog rasmi ah oo cadeynaysa in uu ku sugnaa yahay goobtii ay kasoo qabteen.

Wuxuuna intaas ku daray in xaaladiisa caafimaad ay aad u wanaagsan tahay lana geeyey magaalada Zintan ilaalo aad u xooganna laga hayo , wuxuuna dhinaca kale sheegay in lala qabtay sadex qof oo kale oo la joogtey.

Sayf Al-islam oo xiligii lasoo qabanayey dul jiifey sariir yar ayaa waxaa gacantiisa ka muuqanayey dhaawac xoogan waxaan guud ahaan farihiisa gacanta midigta ahi ay ahaayeen kuwo go’an inkastoo isaga wax wel wel iyo cabsi ahi aanay ku jirin.

Taariikh nololeedka Sayful Islam oo kooban

Sayful Islam wuxuu ku dhashay 5/6/1972-dii xerada (Baab Al-caziiziyah) oo ay qoyska reer Qaddafi degenaayeen, waana ilmihii labaad ee uu Qaddafi ka dhalo xaaskiisii Safiyah Farkaash oo kaalkaaliso caafimaad ahayd islamarkaana Qaddafi u dhashay 5-kale oo caruur ah.

Waxbarashadiisa

Sayful Islaam wuxuu waxbarashadiisa inteeda badan ku qaatay magaalada Tiriboli ee caasimada Libya , Wuxuuna markii uu dugsiga sare dhamaystay ku biiray Jaamacada Tiriboli kulliyadeeda injineernimada dhismaha taas oo uu ka qalin jebiyey sanadkii 1994, intaas kadib wuxuu waxbarasho jaamacadeed u aaday dibadda isagoo culuumta dhaqaalaha ka baranayey jaamacad ku taala dalka Austria oo uu ka qalin jebiyey sanadkii 2000 intaas kadibna wuxuu shahaadada PHD ka qaatay Machad dhaqaalaha lagu barto uu ku yaal dalka Britain.

Xilalkii uu soo qabtay.

Saful Islam markii uu waxbarashada jaamacada heerkeeda 1-aad dhamaystay wuxuu xubin ka noqday Xarunta baaritaanada Wershadaha ee Tiriboli, intaas kadib sanadkii 1996 wuxuu madax ka noqday xafiis uu la taliye ahaan uga shaqeynayey, derajo sare ayuu ka gaarey ciidamada isaga oo aan wax tababar ciidan ah soo qaadan wuxuuna sanadihii ugu danbeeyey Agaasime u ahaa Hay’adda samafalka iyo horumarinta bulshada ee Gaddafi oo la asaasay sanadkii 1998.

Galgalkiisa siyaasadeed.

Sayful Islam ina Qaddafi wuxuu ahaa nin mudooyinkii u danbeeyey kaalin fir fircoon oo muuqata ka ciyaarayey siyasada gudaha iyo tan dibada ee dalka Libya waxayna taasi dhacaysey isaga oo aan haba yaraatee wax xil ah oo rasmi ah ka haynin dowladii uu aabihiis hormuudka u ahaa.

Wuxuu gacan ka geystey wada xaajooydo badan oo is afagarad ku dhamaaday oo dowlada Libya ay la gashay dalal badan oo khilaaf siyaasadeedi uu soo kala dhex galay waxaana qadiyadihii uu wax ka galay kuna guuleystey ka mid ahaa.

Magdhowgii laga bixiyey qaraxii diyaaradeed ee Lockerbie Scotland oo sirdoonka Libya lagu soo eedeeyey in ay ka danbeeyeen 21/Dec/1988 arintaas oo horseeday in uu dib usoo noolaado xiriirkii siyaasadeed ee ka dhexeeyey Libya iyo Maraykanka oo xiligaas wixiii ka horeeyey ahaa mid aan wanaagsaneyn, magdhowgii ay libya qoysaska dadkii shilkaas ku geeriyoodey siisayna wuxuu ahaa 2.7 Bilyan oo Dollar.

Wuxuu kaalin muuqata ka qaatay tanaasulkii ay dowlada Libya ka gaartay sanadkii 2004 samaysashada hubka Necluer-ka ah waxayna talaabadaasi Libya u horseeday in laga hakiyo cunaqabataymo lala damacsanaa lagana qaado kuwo kale oo horay loogu soo rogey dalal badan oo horay arintaas uga biya diidsanaaana ay Libya isu soo dhowaadaan.

Sayful Islam wuxuu sidoo kale dowr muuqda ku lahaa sii deynta kaal kaalisooyin caafimaad oo u dhashay dalka Bulgaria iyo dhakhtar Falastiini ah oo lagu xukumay xabsi daa’im 7/2004 kadib markii lagu helay denbi ah inay cudurka HIV Aids ku talaaleen in ka badan 400 oo caruur Libyan ah Isbitaal ku yaal magaalada Bangazi.

Sidoo kale sanadkii 2000 wuxuu isaga oo ku howl gelaya magaca Ururka samafalka ee Gaddafi gacan ka geystey sii deynta la haystayaal Jarmal ah oo ay kooxda Abu sayyaf ee dalka Filibiin ka jirtaa ay qabsadeen kadib markii uu bixiyey lacag madax furasho ah oo gaareysa 25 Melyan oo Dollar.

Kacdoonkii 17-Feb

Waxaa ayaamihii ay dalka Libya ka bilowdeen kacdoonadii siyaasadeed ee markii danbe isu bedeley dagaalada uu dhiiga badani ku daatay meeshana lagaga saaray xukuumadii uu hormuudka u ahaa Col-kii sida foosha xun loo diley ee xukun jacaylku madax maray ee Qaddafi Sayful Islam uu ahaa nin warbaahinta si kulul uga hadli jirey si cadna u difaaca siyaasada maamulka aabihiis wuxuuna ku tilmaami jirey kooxaha kacdoonka inay yihiin calooshood u shaqeystayaal aan dalka wax dan ah usoo wadin.

Bartamihii bishii May/2011 ayaa dacwad oogaha guud ee Maxkamada Caalamiga ah ee denbiyada dagaalku uu codsaday in lasoo xiro sharcigana la hor keeno Qaddafi, wiilkiisa Sayf, iyo Taliyaha ciidamada sirdoonka Libya Cabdallah Assanusi haseyeeshee waxaa Waarankii sadexdaas qof lagu xiri lahaa uu si rasmi ah usoo baxay 27/May/2011.

Gunaanad

Si kastaba ha ahaatee Sayful Islam oo dadka Siyaasada ka faaloodaa ay ku tilmaami jireen in uu ahaa dhaxal sugaha aabihiisii geeriyoodey ee Qaddafi, mararka qaarna lagu naanaysi jirey Qaddafiga yar ee mustaqbalka ayaa xiligan ku jira xabsi ku yaala magaala Zintan oo ay kooxo badan oo hubeysani ku ilaalinayaan.

Waxaana la filayaa in lagu wareejiyo Maxkamada caalamiga ah ee denbiyada dagaalka in kastoo ay jiraan warar hordhac ah oo soo baxaya sheegayana in la wado qorshe Maxkamada caalamiga ah looga dalbanayo in la meel mariyo qorshe ku aadan sidii Sayful Islam gudaha dalka Libya loogu maxkamadeyn lahaa.

Daawo Video Dagaalka Muqdisho= Meydadka Al-Shabaab iyo Amisom

Dhageyso Barnaamij gaara Gabayo+Khudbado+Heeso Wadaniya

Online inta akhrisanee

--
Dahir Alasow, A senior Radio and TV journalist, a leader of a press watchdog ASOJ, the editor of waagacusub.com, and outstanding commentator with fearless check on actions of the political groups and others players through investigative journalism, plus defender of the public interest and voice to the voiceless through "the truthful tip of his truth pen"
"Tribalism provides NO shelter; it ONLY causes destruction."
"Dugsi Male Qabyaaladi Waxay Dumiso
Mooyaane" Cabdullaahi Suldaan Timacadde

http://www.dahiralasow.com
Tel: +31684863567
dahiralasow@asoj.org
dahir.alasow@mareeg.com
dahir.alasaw@raadtv.com
dahiralasow@waagacusub.com
www.waagacusub.com
www.asoj.org

By Dahir Alasow

Waagacusub is Investigative media with sense of professionalism, fearless in cultivating the truth, informative, unbiased, independent, educative, a role model and a voice to the voiceless.
By Dahir Alasow
+31684863567
Dahir.alasow@asoj.org

Hees Dhiigshiil ha dhigan Download here MP3