Topnews: Edmonton Journal oo warbixin ka qoray Cartoonist Amiin Caamir

Edmonton 28 Fabaury 2009 Waagacusub Media

Wargeys ka soo baxa magaalada Edmonton ee dalka Canada ayaa todobaadkan wax ka qoray farshaxanistaha caanka ee Soomaaliyeed Amiin Caamir kaasoo hanjabaado joogto ah oo dil ah kala kulma sawirada kartuunada ee uu ka sameeyo siyaasada Somalia.

 
Barta Internet-ka ee Edmonton Journal ayaa shalay lagu soo daabacay warbixin dheer oo ka sheekeenaysa Amiin Caamir iyo sawiradiisa nuxurka xambaarsan iyo saameynta ee sida dhabta uga tarjumaya saxaafada xorta ee Soomaaliyeed.waxaana sheekadiisa ciwaan looga dhigay "Amiin Caamir oo loogu hanjabo in lagu dilayo kaartuunadiisa"
Inkastoo dalka Canada uu todobaadkan u dabaal degayey ‘Todobaadka Aqrinta Xoriyada oo sanadkiiba ay mar u dabaal degaan ayaa wargeysku waxa uu leeyahay Amiin Caamir waxa uu maalin kastaa u dabaal degaa xoriyada isagoo farshaxankiisa ku muujiya sidii Somalia ay ula qabsan laheyd dhaqanka xoriyada.

Artistaha caanka ee Amiin Caamir, oo mudo toban sano ku dhow ku noolaa dalka Canada, ayaa sawiradiisa oo ku soo daabaco bartiisa internet-ka www.aminarts.com waxa uu kaga hadlaa dalkiisa oo ay soo wajaheen musuq-siyaasadeed, dagaalo, saboolnimo, abaaro, suxufiyiin la dilay iyo haween la cadaadiyo, iyadoo website-kiisa ay maalin kasta soo booqdaan ama ay aqristaan ilaa toban kun oo ruux.
Hal sawir-kartuun ayaa Caamir waxa uu ku muujiyey sida koox mintidiin Islaami ah ay u burburinayso bulshada inkastoo kooxdaasi ay sheeganayso in ay caawinayso dalka.

Al-Shabaab ayuu soo sawiray iyagoo wato baldoosar weyn oo hoosta ka qodaya meel qar buur ah oo ay dusha ka saaran yihiin dad Soomaaliyeed oo isugu jira haween, caruur iyo dad da’ah kuwaasoo qarka u saaran inay ku soo hoobtaan haadaanta dheer ee ka hooseeyso,wuxuuna Amin Arts sawir gacmeedkiisa ku maciin bidayaa in dadkaas rayidkaa ka badbaadaan baldoosarka ay kooxda Shabaabka ku qodayaan gabaadkooda cirifta yar noqday.

Badi sawir gacmeedyadda uu soo bandhigo Amin Mohamed Caamir ayaa waxay ku qoran yihiin afkiisa Soomaaliga.
Amiin Caamir dalkiisa kuma sameyn karo sawirada noocaani ah isagoo wargeyska u sheegay in la dili lahaa sida xaqiiqda ah.
“Haddii uu sidan ku sameeyo Somalia, waxa uu geli lahaa khatar weyn; waan ognahay taasi,” ayuu yiri madaxa mujtamaca Soomaalida ee Edmonton Maxamed Accord, isagoo intaa ku daray in dadka awooda heysta ee Somalia jooga aysan jecleyn sida uu Amin Arts u bandhigo sawirada ka tarjumaya xaqiiqda ka jirta dalka Somalia.

Mujtamaca Soomaalida ee Edmonton oo tiro ahaan gaaraya ilaa sideed kun ayaa ka hela oo jecel Artistaha oo hadal la'áan ku soo bandhiga xaalada dalkooda hooyo. “Waa geesi, qof kastana wuu hadal hayaa,” ayuu yiri madaxa Soomaalida Edmonton Accord.

Amiin Caamir waxa uu si joogto ah u dhaliilaa oo uu wax uga qoraa kooxaha xagjiriinta oo iyagu doonaya inay dilaan sababo la xiriira kartuunada uu ka daabaco.
Waxaa ku soo dhacaa todobaadkiiba laba jeer fariimo aan la aqoon halka ay ka yimaadeen oo loogu hanjabayo dil.

“waxay ii soo diraan fariimo email ah, oo dhahaya waan ku dilaynaa, waan naqaan meesha aad ku nooshahay,” ayuu yiri Amiin Caamir oo gacan ka hela gabadhiisa Jiija oo iyadu Soomaaliga u tarjunta English. “ Aniga ma cabsanayo, haddii dowlada Somalia ay sameyso wax xun, waan u sheegayaa dadka,” ayuu hadalkiisa sii raacsiiyey Amiin Caamir.
Ma joojinayo ayuu yiri Amiin kartuunadeyda. Waan sii wadayaa shaqadeyda.

“markii aan daabaco kartuuno muran dhalinaya, dadka masaakiinta way igu jeclaadaan, dadka xuna kuma faxraan,” ayuu yiri Amiin isagoo intaa ku daray “haddii dadka masaakiinta ay faraxsan yihiin ana waan faraxsanahay oo waan qanacsanahay sidoo kale.

Xaaska Amiin Caamir Zeynab Ibraahim way ku hanweyn tahay oo way la dhacsan tahay howsha ninkeeda. “ninkeyga, wuxuu u hadlaa dadka aan codka laheyn ee masaakiinta,” ayey tiri Zeynab.
Amiin Caamir iyo qoyskiisa waxa ay Somalia ka soo tageen 1992kii. Qoyskiisa waxa ay u guureen dalka Canada sanadkii 2000 ka dib markii ay muddo ku noolaayeen dalka Jibouti. Markii ay yimaadeen Canada waxay degaan Magaalada Montreal, iyadoo laba sano ka horna ay u guureen Magaalada Edmonton.

Amiin Caamir waxa si weyn garab u siiyey xoriyatul qowlka ka jira dalka Canada, waxa uu noloshiisa ka soo saartaa xirfadiisa farshaxanimo isagoo websitekiisa ku sameeya xayeeysiin ganacsi.

Sanadkii 2007-dii, Amiin Caamir waxa uu ka mid ahaa 18ka Artiste ee Edmonton ee la siiyey mashruuca sawir sameeynta ee lagu soo bandhigay barnaamijka dhaqanka. Amiin waxaa la siiyey 7,500 oo doolar oo u saamaxday isaga inuu sameeyo 30 sawir oo saliida loo isticmaalo oo ku muujiyey doorka haweenka Soomaaliyeed ay ku leeyhiin qoyska iyo bulshada dhexdeeda.

Waxaa rabitaankiisa uu yahay inuu ku hadlo magaca badi muwaadaniinta Soomaaliyeed ee nugul sababtuna waxa ay tahay iyaga oo aan codkooda soo gudbin Karin. “markii ay xumaanto dhacdo, dadka ugu horeeya ee ay saameeyneyso waa Haweenka iyo Caruurta,” sidaas ayuu Amiin Caamir yiri isagoo gacan ka helaya gabadhiisa Jija.

Mar la weydiiyey Amiin Caamir hadii uu weligiis ku laabanayo Somalia, ayuu qoslay oo uu yiri laga yaabee mar dambe intaasi ay dhacdo isagoo markaa u cabsi qaba bal sida ay noqon doonto xoriyadiisa hadii uu Somalia ku laabto.
Waxa uu hadalkiisa ku soo koobay “Xoriyada Waa Shey Wanaagsan”Halkaan ka akhriso Englishka
Qore By: Elizabeth Withey,
Turjume By: Dahir Abdulle Alasow
Photograph by: Rick MacWilliam,
The Edmonton Journal
Barnaamijka Tijaabi Codkaaga Dhageyso

Dhageyso dabaal dega Gor Gor Media Group

Madaxweyne Geelle oo khudbad dheer jeediyay Halkaan ka dhageyso 

 Murtida iyo Majaajilada Waagacusub Dhageyso

Waagacusub Media