Wararka Wargeyska Yool - Kulanka Siilaanyo iyo Geelle

28 November 2011 Waagacusub.com-Wargeyska Yool ee ka soo baxa Hargeysa ayaa Cadadkiisa maanta ku hardhay bogga hore "Iyagaa Hal-hays u Lahaaye, Waa Markii ugu Horeysay ee Jabuuti Biyo Looga Sahamiyo Somaliland"

Hargeysa(Yool)-Masuuliyiinta Xukuumada Somaliland, waxay had iyo jeer markay fagaarayashaa ka hadlayaan caan ku yihiin inay kusoo hal-qabsadaan Waa Markii Ugu Horeysay, xataa haddii ay ka hadlayaan arin ku saabsan jiritaanka Jamhuuriyadda Somaliland, sidaa darteed waa markii ugu horeysay ee Jamhuuriyada Jabuuti oo ah dal Juquraafi ahaan ku yaal dhul lama–degaan u eke ah, isla markaana lagu tiriyo wadamada Biyo-yaraantu ka jirto ama aan lahayn kayd-biyo ah oo ku filan, ayaa waxa sahamin dhinaca Biyaha ah looga wada deegaano ka tirsan xeebta Galbeedka Somaliland.

Haddaba, inkastoo aan si rasmi ah loo shaacin hindisaha qorshahan, hadana xogo Wargeyska “Yool” helay, waxa sheekadani dib-u-soo cusboonaatay tan iyo intii Xukuumada Madaxweyne Siilaanyo hoggaanka talada dalka la wareegtay, kadib markii ay si xawli ah usoo korodhay baahida dhinaca Biyaha ee dalka Jabuuti, taasoo sida lagu sheegay daraasad horraantii Sannadkan laga sameeyey Jamhuuriyadda Jabuuti lagu oggaaday in Biyaha kaydka ah ee dalkaasi leeyahay si weyn hoos ugu dhaceen, iyadoo sidoo kalena uu dhalan-gedis ku yimi dhadhankooda.

Waxa kaloo, wararku intaa ku darayaan in meel ilaa iyo hada loo qorsheeyey in hawlshan laga hirgeliyo ku kooban tahay oo keliya deegaanada hoos-yimaada Gobolka Salal, gaar ahaan Doox Bariisle, oo sida wararku sheegeen hadda ay ka socoto mashruuc Ciid lagaga gurayo Dooxa, taasoo la geeyo dhinaca dalka Jabuuti. Sidoo kale, waxa ilahaasi tibaaxeen in sida qorshuhu yahay lagu talo jiro in Ceelasha laga hirgeliyo agagaarka degmada Ceel-gaal.

Degmada Ceel-gaal, ayaa Toddobaadkii hore Wasiirka Macdanta iyo Biyaha Somaliland, waxa uu xadhiga ka jaray Ceel-biyood ay hirgelintiisa lahayd dawlada Jabuuti, isla markaana sida Wasiirka Khayraadka ee Jabuuti munaasibadaa ka sheegay ay ujeedada hirgelinta Ceelkaasi ugu talo galeen inay kaga qayb qaataan la dagaalanka Biyo-yaraanta iyo Abaaraha deegaanadaa ka jira.

Geesta kale, kulan labada Wasiir maalin ka hor ku yeesheen Magaalada Jabuuti, waxay wada saxeexeen heshiis ay ku micneeyeen inuu yahay mid labada dal iskaga kaashan doonaan dhinacyada Macdanta, Biyaha iyo khayraadka kale ay labadooda wadan leeyihiin, haseyeeshee aanu jirin cid si dhab ah u og waxa uu ku saabsan yahay. Iyadoo, sidoo kalena ay waajib ku tahay Xukuumada inay Goleyaasha Xeer-dejinta soo hor-dhigto heshiisyada ay dalalka iyo shirkadaha ajnebiga ah la gasho.

Inkastoo aanay ahayn markii ugu horeysay ee arintan oo kale dhacdo tan iyo intii hoggaanka dalka gacanta ugu jirey Xukuumada Madaxweyne Siilaanyo, hadana waxa talaabadani kaga duwan tahay heshiiyada iyo qorsheyaashii kale Xukuumadu la gashay shirkado iyo dal kale, kuwaasoo ilaa iyo hadda aan mid qudha la horgeyn Goleyaasha Qaranka ee xaqa u leh go’aan ka gaadhistooda, waxay tahay in aanu jirin habayaraatee qorshe cad oo Xukuumadu ugu talo-gashay inay bedelkiisa kaga qaadato Jabuuti, maadaama khayraadka dalka uu yahay asadka ummadda, sidaa darteed-na waxa keliyee lagu doorsan kara uu yahay waxa Qaranka faa’iido u leh, sida Aqoonsiga oo kale.

Siyaasadaha Hay’adaha Amnigu Miyay Kala Socdaan, Mise Way Wadan Socdaan..!

Burco(Yool)-Ciidanka ilaalada Koontaroolka dhinaca Galbeed Magaalada Burco, ayaa saacadihii danbe ee Habeenimadii Axada ka soo qabtay meel aan ka fogeyn Koontroolka tiro gaadiid ah oo laga leeyahay hay’adaha dhinaca sirdoonka, kadib markii ay ka war-heleen inay wadada ka weecdeen, una degeen jid-cadeyaasha ka baydha wadada Laamiga ah oo ay markii hore socdeen.

Warkan oo Wargeysku ka helay dad deegaanka ah, ayaa waxa uu sheegayaa in Ciidanka Koontroolku markii ay warka dhacdaas heleen inay durbadiiba ku soo baxeen goobtii, kadibna daqiiqado yar gudahood ku heleen Gaadiidka iyo dadkii wataybe, haseyeeshee waxa wararku intaa ku dareen in markii ay qadar yar u sii socdeen dhinaca Magaalada qaar ka mid ah shaqsiyaadkii Baabuurta saarnaa ay la hadleen xubno ka mid ah dadka ay wada-shaqaynta leeyihiin ee ku sugan Burco, kuwaasoo iyaguna markii lala hadalsiiyey Ciidamadii hawlgalka samaysay u sheegay dadka iyo Gaadiidka ay soo wadaan-ba.

Waxaana wararku intaa ku dareen in markii Ciidamadu ku qanceen aqoonsigooda ay dib xoriyadooda ugu celiyeen, sidoo kale shaqsiyaadka iyo gaadiidka ciidanka ilaalada Koontroolka Burco soo qabteen, ayaa la sheegay inay ka tirsanaayeen hay’adaha sirdoonka ee gacan-saarka la leh sirdoonka qaranka, balse waxa ilahaasi ka gaabsadeen inay si cad u tilmaamaan meelaha ay ka tirsan yihiin, maadaama aanay aqoon fiican u lahayn qaybaha hay’adaha sirdoonka qaranka iyo kuwa wada-shaayntu ka dhexayso.

Haddaba, inkastoo Ciidaanku muujiyey feejignaan iyo masuuliyad ku saabsan gudashada hawlaha xilku ka saaran yahay, sidoo kalena ay dhici karto inay masuuliyiinta sirdoonka lafdigoodu hawshan u samaynayeen inay ogaadaan ilaa heerka uu gaadhsiisan yahay feejignaanta iyo xataa haddii ay arintan oo kale dhacdo bal ilaa heerka uu gaadhsiisan yahay in Ciidanku talaabo ka qaado, hadana waxa haboon inuu jiro xidhiidh wada-shaqayneed oo mar-leyba u dhexeeya masuuliyiinta sare ee hay’adaha amniga, kaasoo ah mid wax weyn ka tari kara la dagaalanka shaqsiyaadka duulaanka ku ah amniga nooc ay doonan-ba ha noqdaan’e.

Haddiise taa la waayo waxaan shaki ku jirin in si dhib yar xataa iyaga gudahooda la isu adeegsado, halkaana uu ka yimaado baylaha iyo dayacaad fursad weyn u noqota dadka aan nabadgelyada jeclayn.

Madaxweynaha Jabuuti oo Xafiiskiisa ku Qaabilay Dhiggiisa Somaliland

Djibouti(Yool)-Madaxweynaha Jamhuuriyadda Djibouti Ismaaciil Cumar Geelle, ayaa shalay xafiiskiisa kula kulmay hoggaamiyaha Somaliland Md. Axmed Maxamed Maxamuud (Siilaanyo) oo booqasho ku jooga dalkaas.

Maadaxweyne Geelle iyo Siilaanyo waxa ay yeesheen kulan socday muddo saacado ah, waxaana la sheegay in ay labada Hoggaamiye ka wadahadleen xidhiidhka labada labada ee dhinacyada amaanka, ganacsig iyo dhaqaalaha.

Waxa kale oo labada Madaxweyne ay isla soo qaadeen sidii loo dhamaytiri lahaa heshiisyadii ay labada dal sannadkii hore kala saxeexdeen.

Dhinaca kale, waxa Madaxweynaha Jamhuuriyada Djibouti u sameeyay Madaxweynaha Somaliland iyo weftigiisii kulan kale oo qado-sharaf ahaa.

Sidoo kale, Ra‘iisal-wasaaraha dalka Djibouti Dalayta Maxamed Dalayta ayaa maalinti shalay qaabilay weftiga Somaliland.

Ciyaaraha

Liverpool iyo Man City oo Isku Garab Dhacay, Sky Blue oo Weli Laga Badin La’yahay

By Saed Mohamed Balaleti

Fursadii qaaliga aheyd ee uu badbaadiyay ciyaaryahan Joe Hart ayaa keentay in 10 ciyaaryahan oo City ah ay ilaaliyaan rikoorka aan weli looga badin Man City Premier League ka dib markii ay barbaro 1-1 ah kula galeen Liverpool garoonkooda Anfield.

Goolhayaha reer England ayaa badbaadiyay fursad qaali aheyd intii lagu guda jiray seddexdii daqiiqo ee ciyaarta lagu daray, ka dib markii madax uu soo galay Andy Carroll, waxaana kooxdiisa ay haatan shan dhibcood ku heysaa hogaanka horyaalka Premier League.

Vincent Kompany ayaa kubad madax aheyd hogaanka ugu dhiibay City daqiiqadii 31aad ee ciyaarta ka hor inta uusan Joleon Lescott labo daqiiqo ka dib gool iska dhalin ka dib markii Charlie Adam uu kubad uu soo tuuray ay ku dhacday taasoo qiyaantay goolhaye Joe Hart.

Mario Balotelli oo bedel ku soo galay ciyaarta qeybtii danbe ayaa 18 daqiiqo gudahood waxa uu ku qaatay labo jaale taasoo keentay in casaan la siiyo, waxaana uu kooxdiisa ku qasbay inay ku ciyaaraan 10 ciyaaryahan 10kii daqiiqo ee ciyaarta ugu danbeysay.

Ciyaaryahan reer Italy ayaa waxa uu seegi doonaa kulanka Carling Cupka ee Arsenal ay la ciyaari doonaan, waxaana muuqaneysay inay isku dhaceen isaga iyo tababare Robeto Mancini.

Labada kooxood ayaa labadii qeyb ee ciyaarta fursado badan iska qasaariyay, iyadoo Joe Hart iyo Pepe Reina ay sameeyeen dadaal dheeri ah oo kooxahooda guuldarro kaga badbaadiyeen.

Kulankaan ayaa waxaa hareeyay geerida tababarahii xulka Wales Speed, taasoo keentay in Kenny Dalglish uu kooxda ka saaro Craig Bellamy oo ka tiiraanyeeysnaa dhimashada tababarihiisa xulka qaranka.

Liverpool ayaa waxa ay ku jirtaa haatan kaalinta 6aad waxaana ay isku dhibco yihiin Arsenal oo 7aad ku jirta waxaana ay wadaagaan 23 dhibcood.

Tababarihii Xulka Qaranka Wales Gary Speed oo Is Diley

Tababarihii xulka qaranka Wales Gary Speed ayaa laga helay shalay subax isagoo meyd ah gurigiisa waxayna la rumeysan yahy in uu Gary Speed uu isdiley.

Speed oo 42 jir ahaa ayaa tababare u ahaa xulka Wales tan iyo bishi December ee 2010, waxana xulka dalka Wales uu shan kulan oo heer caalami ah uu afar ka mid ah guulesytey waxana uu ka galay qiimeynta xulalka caalamka heerka 50aad.

Speed waxa uu hore uga soo mid noqday ciyaartoyda xulka Wales isagoo muddo 14 sano ka mid ahaa xulka saftayna 85kulan oo heer caalami ah.

Speed ayaa intii uu kubbada ku soo dhex jirey waxa uu la soo qeybsaday kooxda Leeds oo ku guuleysatay horyaal sanadkii 1992dii. Waxa uu Speed hore ugu soo saftay kooxo ay ka mid yihiin New Castle, Everton, Bolton iyo Sheffield United. Speed ayaa muddo 22-sano ahayd ciyaari jirey kubbada cagta isagoo saftay illaa 700 oo kulan mudadaas.

Speed ayaa haystay rikoorka u yiil ciyaaraha Premier Leagu ee ciyaaryahannaa kii ugu safashada badnaa isagoo saftay 535 kulan tan iyo sanadkii 2009kii xilligaa oo uu la wareegay goolhaye David James.

Speed ayaa ka fariistey ciyaarida kubbada cagta sanadkii 2010ka isagoo u wareegay dhinaca tababarka waxana uu noqday tababaraha kooxda Sheffield United.

Speed ayaa lagu abaalmariyey abaalmarinta la yiraahdo MBE sanadkii 2010, waxana uu ka tegey xaas iyo labo carruur ah.

“..Tartanka La Liga Weli Ma Dhamaan, Real Madrid Waan Garaaci Karnaa..”

David Villa

Weeraryahanka kooxda Barcelona David Villa ayaa sheegay inuu filayo in kooxdiisa ay seddex dhibcood ka qaadan doonto kooxda Real Madrid marka ay labada kooxood El Clasico ku ciyaarayaan Bernabeu 10ka bisha December.

Guuldaradii xalay Barcelona ka soo gaartay Getafe ayaa ka dhigeysa inay lix dhibcood ka danbeeyaan Los Blancos, kuwasoo 4-1 ku xaaqay kooxda Atletico Madrid.

Ciyaarta ka dib goolhayaha Barcelona Victor Valdes ayaa qirtay in kooxda reer Catalans ay dib uga dhacday tartanka horyaalka, lakiin Villa ayaa aamisan in kooxdiisa ay soo yareyn karto farqiga u dhaxeeya marka ay u safraan Santiago Bernabeu.

“..Tartanka weli ma dhamaan, dhawaan iyaga ayaan la ciyaareynaa, si degan ayaana u garaaci karnaa, waana waxa aan haatan ka fekereyno..” ayuu Villa u sheegay Barca TV.

“Waa wax ceeb ah inaan intaan u jirsano kooxda hogaanka heysa..” ayuu yiri.

“..Waa inaan badinaa kulanka talaadada ee aan la ciyaareyno Rayo Vallecano, ka dibna halkaas aan ka sii socono”.

Tababaraha Man United oo ku Adkeysanaya in Rio Ferdinand uu Labada Sanno oo Kale Ciyaari Karo

Tababaraha Manchester United Sir Alex Ferguson ayaa aaminsan in weli daafaca kooxda Man United ee Rio Ferdinand uusan ka dhamaan mustaqbalkiisa garoonka Old Trafford.

Shaki ayaa soo baxay oo ah qaab ciyaareedka Ferdinand ee kooxda Man United kadib markii uu sheegay Ferguson in ay hoos u dhacday awooda daafaca kooxda Man United ayna tahay in uu bedelo qaab ciyaareedkiisa.

Kabtankii hore xulka England oo hadda 33jir ah ayaa lala xiriiriyey inuu ku biirayo kooxda Tottenham iyo weliba warar kale oo la xiriirinayay laacibkan kooxo ka dhisan dalka Maraykanka dhamaadka xilli ciyaareedkan.

Inkastoo uu Ferguson qirtey in uu qorsheynayo maalintii uu bedeli lahaa Ferdinand balse wuxuu aaminsan yahay in aan taa weli la gaarin.

“Ma jiro wax qorshe ah oo ah inaan iska fasaxo Rio,” ayuu yiri Ferguson. “Wuxu leeyahay waayoaragnimo waxana uu yahay mid weli qeyb ka ah ciyaarteena waana qof nagu weyn marka lagu jiro qolka nasashada. “..Ciyaartoyda kor ayay u fiiriyaan, taasna way socon doontaa. Wuxuu u ciyaari karaa si fudud labo sano oo kale. “..Wuxuu ahaa ciyaaryahan wanaagsan, balse xaqiiqdii uma dhaqso badna sidii uu ahaa shan sano kahor.

“Taasina waa mid iska caadi ah, dadku waa cuslaadaan, balse wuu la qabsada ciyaarta qaab ciyaareed la yaab leh ayuuna hadda la soo baxay.” Dhaawacyo soo gaaray ayaa arrinka ku sii cusleeyey Ferdinand. Ferdinand ayaa ku soo biirey kooxda Man United sanadkii 2002 xilligaa ookooxda Leeds loogaga soo iibsaday lacag gaareysa £29.1million.

Tababaraha ManUnited Ferguson ayaa qorshe mudada fog ee ciyaartoydiisa sameeyey kadib markii uu la soo wareegay dhowaan ciyaaryahano daafaca ka ciyaara oo dhalinyaro ah sida Chris Smalling iyo Phil Jones, waxayna u muuqdaan dhalinyaradan kuwii bedeli lahaa daafacyada cuslaaday ee Ferdinand iyo Nemanja Vidic.

Daawo Video Dagaalka Muqdisho= Meydadka Al-Shabaab iyo Amisom

Dhageyso Barnaamij gaara Gabayo+Khudbado+Heeso Wadaniya

Online inta akhrisanee

--
Dahir Alasow, A senior Radio and TV journalist, a leader of a press watchdog ASOJ, the editor of waagacusub.com, and outstanding commentator with fearless check on actions of the political groups and others players through investigative journalism, plus defender of the public interest and voice to the voiceless through "the truthful tip of his truth pen"
"Tribalism provides NO shelter; it ONLY causes destruction."
"Dugsi Male Qabyaaladi Waxay Dumiso
Mooyaane" Cabdullaahi Suldaan Timacadde

http://www.dahiralasow.com
Tel: +31684863567
dahiralasow@asoj.org
dahir.alasow@mareeg.com
dahir.alasaw@raadtv.com
dahiralasow@waagacusub.com
www.waagacusub.com
www.asoj.org

By Dahir Alasow

Waagacusub is Investigative media with sense of professionalism, fearless in cultivating the truth, informative, unbiased, independent, educative, a role model and a voice to the voiceless.
By Dahir Alasow
+31684863567
Dahir.alasow@asoj.org

Hees Dhiigshiil ha dhigan Download here MP3