| Kulan la
qorsheeyay in xalay la isku horfadhiisiyo
Madaxweyne Daahir Rayaale Kaahin iyo hoggaamiyaha
KULMIYE Md. Axmed Maxamed Siilaanyo
Kulan
la qorsheeyay in xalay la isku horfadhiisiyo
Madaxweyne Daahir Rayaale Kaahin iyo hoggaamiyaha
KULMIYE Md. Axmed Maxamed Siilaanyo, ayaa
fashilmay, ka dib markii uu xisbiga KULMIYE
sheegay inaanu kulankaasi suurto gal ahayn.
Akademiga Nabadda iyo horumarka Somaliland ee
xaruntiisu tahay magaalada Hargeysa, ayaa
maalmihii u dambeeyay ku dhex jiray dhexdhexaadin
ay ku doonayeen inay ku xalliyaan khilaafaadka
siyaasadeed ee ka taagan waddanka, waxaanay kulamo
gooni gooni ah la yeesheen Madaxweyne Daahir
Rayaale Kaahin iyo hoggaanka xisbiga KULMIYE,
kulamadaas ayay gunaanadkoodii ku diyaariyeen
kulan ay ugu tallo galeen inay cawaysinkii xalay
isku horfadhiistaan Madaxweyne Daahir Rayaale iyo
Md. Axmed Maxamed Siilaanyo, si ay uga wada
hadlaan xaaladda adag ee wadanku ku jiro. Hase
yeeshe, kulankaas ayaa fashilmay, ka dib markii
xisbiga Mucaaradka ah ee KULMIYE ku wargeliyay
Akademiga Nabadda in fursad la siiyo islamarkaana
la xoojiyo dhexdhexaadin uu muddooyinkii u
dambeeyay guddoomiyaha Golaha Wakiilada Md.
Cabdiraxmaan Cirro isaga dab qaadayay Madaxweyne
Rayaale iyo madaxda xisbiyada Mucaaradka.
Akademiga Nabadda
Akademiaydda Nabadda oo shalay warsaxaafadeed soo
saartay , ayaa ka warantay sababaha baajiyay
kulankaas ay qorsheeyeen ee ay doonayeen inay
iskugu keenaan Madaxweyne Rayaale iyo Axmed
Siilaanyo, “Habeen iyo maalin is xigay (6/5/08
iyo 7/5/08) markii aanu la kulanay hoggaanka
xisbiga KULMIYE ee aanu wada gorfaynay
dhiabatooyinka hortaagan doorashooyinka iyo
diiwaangelinta, ka dib ayaanu balan la qabsanay
Madaxweynaha Jamhuuriyadda Somaliland.” Ayaa
lagu yidhi warsaxaafadeedka Akademiga, waxaanu
intaas raaciyay, “Falanqayn iyo gorfayn qoto
dheer ka dib waxaanu ka codsanay in uu la kulmo
hoggaanka xisbiga KULMIYE, taas oo uu naga
ogolaaday isaga oo habeenimadii 8/5/08, na soo
siiyay balan ah 10/5/08, saacaddu marka ay tahay
8-da habeenimo in ay madaxtooyada ku kulmaan
Madaxweynaha, guddoomiyaha xisbiga KULMIYE,
Akaademiguna goob joog ka ahaado. Warkii ayaanu af
ahaan ugu gudbinay hoggaanka KULMIYE, 9/5/08
barqonimadii Jimcaha. 10/5/08 oo maalin Sabti
ahayd farriin aanu ka helnay xisbiga KULMIYE, waxa
na loogu sheegay in aanay balantaasi wakhtigan la
joogo suurto gal ahayn iyaga oo sababayntooda
sheegay. Sidaasna waxa ku baaqday ballankaas.”
Axmed Siilaanyo
Guddoomiyaha xisbiga Mucaaradka ah ee KULMIYE Md.
Axmed Maxamed Siilaanyo, ayaa isaguna
warsaxaafadeed uu shalay soo saaray waxa uu kaga
hadlay qorshaha dhexdhexaadineed ee
Akademiga iyo mawqifkooda ku waajahan kulanka ay
Akademigu ku doonayeen inay Madaxweyne Rayaale
isku horfadhiisiyaan, “Arrinta xisbiyada
Mucaaradka iyo Madaxweynaha, waxa dhex
dhexaadinayay oo muddo ku jiray guddoomiyaha
Golaha Wakiilada Md. Cabdiraxmaan Maxamed
Cabdillaahi (Cirro), labada xisbina arrintaas waa
ka wada socdeen, tallo-wadaagna way ka lahaayeen.”
Ayuu yidhi Warsaxaafadeedka Axmed Siilaanyo,
waxaanu intaas raaciyay, “Haddaba, Akademiyadu
shalay ayay gooni ahaan ugala soo xidhiidhay
arrintaas xisbiga KULMIYE. KULMIYE wuxuu ka
codsaday Akademiyadda in fursad la siiyo, lana
xoojiyo dhexdhexaadinta uu ku jiro guddoomiyaha
Golaha Wakiiladu Md. Cabdiraxmaan Maxamed
Cabdillaahi (Cirro). KULMIYE, mar walba wuxuu
xoojinayaa nabadda, wuxuu aaminsanyahay in
khilaafaadka siyaasiga ah wada hadal lagu
dhammeeyo.”
Gunaanad
Dhexdhexaadinta Akademiga ayaa waxa ay ku soo
beegantay iyadoo uu guddoomiyaha Golaha Wakiilada
Md. Cabdiraxmaan Maxamed Cabdillaahi (Cirro)
muddooyinkii u dambeeyay ku jiray dedaal uu iskii
isugu xilsaaray oo uu ugu guntaday xallinta
khilaafaadka murugsan ee wadanka ka taagan. Isaga
oo isaga dab qaadayay Madaxweyne Rayaale iyo
madaxda xisbiyada Mucaaradka oo si weyn isugu
maandhaafsan muddo kordhintii Golaha Guurtidu u
samaysay xil haynta Madaxweynaha iyo ku xigeenka,
iyadoo shantii sanno ee Madaxweyne Rayaale iyo ku
xigeenkiisa la doortay ku eegtahay 15 May oo
toddobaadkan ah.
Dhinaca kale ma cadda sababta masuuliyiinta
Akademiga dhexdhexaadintooda ugu koobeen xisbiga
KULMIYE iyo Madaxweyne Rayaale, islamarkaana
kulanka xalay la qorsheeyay ee aan qabsoomin ay
uga reebeen hoggaanka xisbiga UCID oo ay KULMIYE
isku mawqif ka taaganyihiin muranka siyaasadeed ee
xilligan dalka ka aloosan.
Source:
Geeska Afrika
|
