Ergadda garabyada dowlada federalka
iyo Isbaheysiga dib u xoreynta ee ka qeybgalay xafladda
wejiga koowaad ee furitaanka wada hadalada labada dhinac
ayaa dhoolatus siyaasadeed ka sameeyay gabagabadii kala
taga is aragooda oo ka dhacday gurigga Ummadda Jabuuti.
Ergadda labada dhinac oo la rumeysan yahay inay
siyaasad ahaan heshiis hoose gaareen ayaa markii ay
isugu tageen gudaha hoolka shirka kuraasta kala
fogeeystay,waxayna markii ay xaflada idlaatay ka kala
baxeen labo albaab ,taas oo ay diblomaasiyiinto u arkeen
qorshe ay wataan garabka Isbaheysiga oo doonayo inay
qanciyaan taageerayaashoda oo caro xoogan ka muujiyay
wada hadalada ay la galeen dowlada federalka wakiilo ka
socda.
Xafladda furitaanka wejiga koowaad ee wada hadalada
dowlada iyo Isbaheysiga oo ay ka qeybgaleen
diblomaasiyiin ka socotay beesha Caalamka waxaa furay
Ergayga Qaramadda Midoobay u qaabilsan Soomaaliya Amb
Ahmed Ould Abdalla oo xubnaha labada garab iyo shacabka
Soomaaliyeed ugu baaqay inay ka faa-iideystaan dib u
heshiisiinta la isku hor fariisiyay labada dhinac.
Amb Ahmed Ould wuxuu wada hadalka furmay ku tilmaamay
fursad dahabiya oo noqon karto midii ugu dambeysay ee
Soomaaliya la siiyo.wuxuuna xusay sida lagama maarmaan
ay u tahay inay labada dhinac tanaasul sameeyaan si xal
loo gaaro.
Wakiilka Midowga Yurub ahna Safiirka dowlada
Faransiiska u fadhiya dalka Jabuuti oo isagana khudbad
ka jeediyay xaflada furitaanka wada hadalada labada
dhinac ayaa garabyadda Soomaaliya ugu baaqay inay
marxalada dalkooda soo afjaraan kana heshiiyaan
khilaafaadka siyaasadeed si shacabka Nabad ugu noolaado.
Wakiilka Jaamacadda Carabta ee arrimaha Soomaaliya oo
isagana khudbad ka jeediyay xaflada ayaa Qaramadda
Midoobay ku amaanay doorkeeda dib u heshiisiinta
Soomaaliya wuxuuna dowlada iyo Isbaheysiga kula taliyay
inay tixgeliyaan hanaanka wada xaajoodka uu garwadeenka
u yahay Amb Ahmed Abdallah.
Wakiilka Midowga Afrika uga qeybgalay furitaanka
xaflada wada hadalada garabyada Soomaaliya ayaa xusay in
golaha Afrika dhiirigelinayo xasilooni lagu dabaalo
dalka Soomaaliya,wuxuuna taas ku sheegay mid lagama
maarmaana oo ka dhalan karto wada hadalada ka furmay
Jabuuti.
Wasiirka dib u heshiisiinta ee dowladda Federalka oo
hogaaminayay ergadda dowlada ee ka qeybgalaya wada
hadalada ayaa wax lagu farxo ku qiimeeyay kulanka uga
furmay Jabuuti,wuxuuna Isbaheysiga dib u xoreynta ugu
baaqay inay dhiirigeliyaan sida ugu haboon ee lagu soo
afjari kara colaadaha shacabka Soomaaliyeed ragaadiyay
in ku dhaw labaatan sanadood ee sabab u noqday inay
ardayda Soomaaliyeed waxbarasho la'aan ku habsato
Madaxa Ergadda Isbaheysiga dib u xoreynta Soomaaliya
Mudane Cabdi raxmaan Cabdi Shakuur ( Cabdi raxmaan
dheere) ayaa isagana ka hadlay xaflada wuxuuna tibaaxay
in Soomaaliya ay ka socdaan xasuuq iyo tacadiyo ay
fulinayaan Ciidamadda Itoobiyaanka iyo dowlada federalka
isagoo ugu dambeyntii sheegay in dalka Soomaaliya uu ka
dhigan yahay Kawaan xiran.
Wasiirka Aawqaafta iyo arrimaha Diinta Jabuuti Xaamud
Cabdi Suldaan oo shirgudoominayay xaflada furitaanka
wada hadalada garabyadda Siyaasadda Soomaaliya isku haya
ayaa labada dhinac ku wacyigeliyay inay ilaah ka baqaan
oo ka wada shaqeeyaan sidii dalka Soomaaliya nabad loogu
dabaali lahaa.
Abwaan Maxamud Cabdulahi Sangub ayaa gabay suugaaneed
wacyigelina oo ku saleeysan xaqiiqada Soomaaliya ka
jeediyay madasha labada kooxood,wuxuuna xusay muhiimada
wadaniyada iyo wadajirka ummadda Soomaaliyeed iyo
halista gumeeysiga.
Hoolka ay Xafladda ka dhacday ee Gurigga Ummada
Jabuuti waxaa la dhex suray sedexda Calan ee
Jabuuti,Qaramadda Midoobey iyo Soomaaliya taas oo
muujineysay sida loo soo agaasimay qiimeeynta wada
hadalada labada garab ee ugu awooda badan Soomaaliya
Furitaanka Xafladda labada dhinac waxaa ka soo
dhexmuuqday hogaamiyaashii fashiliyay shirkii dib u
heshiisiinta Khartoum June
22, 2006 sida Proff Ibrahim Xasan Cadow,Dahir
Geelle,Maxamed Cali Ibrahim iyo Cabdulahi Sheekh
Ismaaciil oo la tiriyo inay xariif ku yihiin abuurista
jawi dhaqaale iyo jalaafeynta wada hadalada nabadeed.
Cabdulahi Sheekh Ismaaciil iyo Ibraahim Xasan Cadow
waxay u muuqaal ekaayeen labo qof oo is aqoon hasse
yeeshee kulanka Jabuuti kama dhignaa midkii ugu horeeyay
ee ay isku arkaan,waxaana dadka xog ogaalka sheegaan
inay xiriir hoose leeyihiin.
Ibraahim Xasan Cadow kama tirsana golayaasha
Isbaheysiga dib u xoreynta wuxuuse markii ugu dambeysay
ahaa Xoghayaha arrimaha dibadda ee golahii
Maxaakiimta,waana tan ay dad badan isu weydiinayaan
kaalinta uu ku leeyahay wada hadalada labada dhinac
waloow uu yahay saaxiibka siyaasadeed ee Shariif Sheekh
Axmed oo ay isla saxiixeen hindisahii ugu dambeeyay ee
Nairobi,kuna ogolaadeen wada hadalada furmay ee
mucaaradada ka hareysay dhinaca Casmara
