Wararkii
ugu dambeeyay shirka Jabuuti iyo Wariye Abdifitahaam.
DJabouti
17
/May/2008
Waagacusub.com
Waxaa Magaalada
Jabuuti lagu soo xiray shirkii mudada afarta cisho ugu
socday kooxaha Siyaasada Soomaaliya isku haya ee
Dowlada Federaalka iyo Isbaheysiga dib u xoreynta
Soomaaliya.
Saxaafada waxaa garoonka diyaaradaha Jabuuti kula hadlay
Wakiilka QM u qaabilsan arrimaha Soomaaliya Mr. Ahmadu
Walad waxuu tibaaxay inay guulo ku dhamaadeen dhamaan
kulamadii afartii cisho ee lasoo dhaafay Jabuuti ugu
socday kooxaha Soomaalida.
Wakiilka waxuu sheegay in qodobo dhowr ah ay labada dhinac
isku afgarteen kuwaasoo uu ku tilmaamay horseedka nabada
Soomaaliya inay kaalin weyn ka ciyaari doonaan.
Waxa uu sidoo kale sheegay in dhawaan Saxaafada loo qeybin
doono qoraalo cadeynaya waxyaabaha labada dhinac ku
heshiiyeen labada garab ee federalka iyo isbaheysiga.
Wakiilka wuxuu xusay in kooxaha Soomaalida ay dib ugu
laabanayaan goobaha ay ka kala yimaadeen ee kala ahaa
magaalooyinka Muqdisho iyo Asmara isla markaana wada
tashiyo lasoo sameyn doonaan madaxdooda goobahaasi ku
sugan kadibna 31 bishaan ay dib Jabuuti ugu soo
laabanayaan.
Mar wax laga weydiiyay halka uu ku dambeysay sharuudii
Isbaheysiga dib u xoreynta ee aheyd in ciidamada
Ethiopian-ka dalka ka baxaan ayuu sheegay in taasi xal
laga gaaray isla markaana Qaramada Midoobay xiligaan wado
qorshe ciidamada Ethiopian-ka si deg deg ah dalka
Soomaaliya loogu bixinayo.
"Dadka Soomaaliyeed waa xor hadii ay diidaan
joogitaanka ciidamada Ethiopian-ka ee dalkooda, waa qasab
in laga bixiyo, dhawaana waxaan ku raja weynahay in dalka
Soomaaliya laga bixin doono dhamaan ciidamada Ethiopian-ka
ee xiligaan ku sugan" ayuu yiri Walad.
Axmed Walld Cabdalla ayaa waxa uu ku nuuxnuuxsaday in QM
ay damaanad qaadeyso in CIidamada Ethiopia ay ka baxaan
dalka Somalia hadii ay guulaystaan wada hadalada u
dhaxeeya dhinacyada Somalida.
Wakiilka gaarka ee QM u qaabilsan arimaha Somalia wuxuu
tibaaxay inuu rajo weyn ku qabo xal waara oo laga gaaro
wada hadalada isla markaana wejigii hore lagu soo gaba
gabeeyay dalka Jabuuti.
Waxa uu sheegay inay kooxaha codsadeen in la badiyo ergada
shirka ka qeyb galeysa oo hada aheyd dhinac kasta toddobo
ruux isla markaana laga dhigo afar iyo tobban ruux taasoo
la aqbalay.
Ergada shirkaan Jabuuti ka socda ugu qeyb galeysay Dowlada
Federaalka iyo Isbaheysiga dib u xoreynta ayaa ka
gaabsadeen inay la hadlaan Saxaafada, balse ay la hadli
doonaan marka uu guud ahaan soo gaba gaboobo shirka dib u
heshiisinta.
Xubnihii ka socday Dowlada KMG ah ayaa ka duulay
Jabuuti iyadoo lagu soo waramayo inay gaareen Magaalada
Muqdisho, kulana la yeesheen Madaxweyne Cabdilaahi Yuusuf
iyo Ra'iisul-wasaare Nuur Cadde.
Xubnaha Isbaheysiga dib u xoreynta Soomaaliya ayaa wali ku
sugan Jabuuti, iyadoo warar hoose ay sheegayaan inuu jiro
khilaaf xoogan oo u dhaxeeya xubnaha ugu sareeya
Isbaheysigaan oo qaarkood diidan ka qeyb galka shirkaan,
taasina ay keentay inay xubnahaan u laaban waayaan Asmara
ayna fariisin KMG ah ka dhigteen magaaladaan Jabuuti.
Xiriir aan isku dayay inaan la sameeyo xubno kamid ah
mas'uuliyiintaan Isbaheysiga dib u xoreynta uga qeyb
gashay shirka ayay ka gaabsadeen inay warbixin iga siiyaan
sababta ay Jabuuti ugu sugan yihiin, xili QM ay sheegtay
in labada dhinac la fasaxay ayna kala aadayaan goobaha ay
hore ugu yimaadeen si ay mas'uuliyiintooda ula soo
tashtaan.
Isku soo duuboo, Kooxaha Soomaalida ee shirkaan loogu
qabanayay magaalada Jabuuti ayaa inta badan is diidan,
balse QM ayaa ku dadaaleysa sidii ay isku soo hor fariisin
laheyd labada ergo oo ay u kala dabqaadeyso garwadeena ka
tahay shirkaan Jabuuti ka socda.
Abdifitahaam Ahmed
Djibouti
Email: abdifitahaam@yahoo.com
Daawo
Barnaamij gaara oo xiisa badan
Xasuusta Marxuum Axmed Nuur Jaangoow iyo laxamadiisa
Heesta Dhaxalsuge Maxamed Aadan Shamuuri MP3
Halkaan ka dhageyso Warbixinta Weriye Xasan Cadde
