Afhayeenka
Somaliland oo erayo qabyaalad kula kacay Saxafi reer
Muqdisho ah.
Hargeysa
17
/May/2008
Waagacusub.com
Afhayeenka
Madaxtooyada Somaliland ahna La taliyaha Madaxweyne Rayaale
ee dhinaca Warbaahinta Mudane Saciid Cadaani Mooge ayaa
shalay duhurkii gafweyn u geystay Wariye reer Muqdisho ah,
balse in muddo ah ku sugnaa Somaliland kana shaqeynayay.
Wariyahaan oo lagu magacaabo Xadiis Maxamed Xadiis ahna
Tifaftiraha Shabakada Baadiye.com ayaa isku dayay inuu
su'aal weydiiyo Madaxweyne Ku xigeenka Somaliland oo
shir jaraa'id ku qabtay xarunta Madaxtooyada Somaliland ee
magaalada Hargeysa.
Wariye Xadiis ayaa lagu soo waramayaa inuu kor u kacay
isla markaana yiri Mudane Madaxweyne Ku xigeen waxaan
rabaa inaan ku weydiiyo .... balse inta uusan su'aasha
dhameysan ayaa kor waxaa usoo kacay Afhayeenka
Madaxtooyada Somaliland Saciid Cadaani Mooge oo yiri
"Waryaa hee naga fadhiiso, waxaad tahay Somaliweyn
AAMUS", taasoo aad ugu caroodeen Saxafiyiinta kasoo
qeyb gashay shirkaasi jaraa'id.
Wariye Xadiis Maxamed Xadiis oo xalay Waagacusub la
xiriirtay isagoo ku sugan magaaada Hargeysa ayaa sheegay
in aflagaadadii shalay uu geystay Afhayeenka Madaxtooyada
ay aheyd mid qabyaaladeed oo cadeynaya waxa caloosha ugu
jiray Afhayeenka balse isaga taasi uusan waxba u arkin
howshiisa Saxaafadeedna uu wadan doono.
Waxa uu sheegay in Afhayeenka ula jeeday Somaliweyn baa
tahay naga aamus, in Wariyaha uusan Somaliland u dhalan
kana soo jeedo Muqdisho, sidaasi darteedna uusan su'aal
weydiin karin Madaxweyne K/xigeenka Somaliland.
Bahdii Saxaafada ee shalay shirkaasi jaraa'id ka qeyb
galay ayaa aad ugu carooday arrintaa meesha ka dhacday,
iyadoo qaarkood erayo kulul ugu jawaabeen Afhayeenka
Madaxtooyada, balse markii dambe iska aamuseen.
"Aad baan arrintaa ugu xumaaday, waxeyna ii cadeysay
in Afhayeenka Madaxtooyada Somaliland oo muddo aan dhagta
ka maqlayay inuu yahay nin Qabiil, uusana matalin Qaranka
Somaliland" ayuu yiri Wariye kamid ahaa wariyaashii
shalay ka qeyb galay shirka Jaraa'id.
Madaxweyne K/xigeenka Somaliland ayaa la sheegay inuu aad
ugu carooday arrintaa foosha xumeyd ee shalay kasoo
yeertay Afhayeenka Madaxtooyada Somaliland, isla markaana
marka uu Afhayeenka eraygaa yiri indho adag ku eegay.
Wariye Xadiis Maxamed Xadiis ayaa Waagacusub u sheegay in
dhowr jeer ay madax ka tirsan Somaliland u gafeen,
kuwaasoo liiday awoodiisa isla markaana ku tilmaamay
qaxooti ku sugan Somaliland oo sidii la doono laga yeeli
karo.
Wariyaha waxuu sheegay inay erayo qabyaaladeed ay labo
jeer oo hore ku yiraahdeen Wasiirada Warfaafinta Axmed
Xaaji Daahir Cilmi iyo Wasiir K/xigeenka Cadaalada Yuusuf
Ciise Ducaale "Talaab".
"Aniga oo hotel Mansoor ku sugan bartamihii sannadkii
lasoo dhaafay xili shir jaaa'id uu ku qabanayay halkaasi
Wasiirka Warfaafinta Somaliland Axmed Xaaji Daahir, ayuu
Axmed iga qaaday Cameradii aan watay, waxuuna yiri aaway
askartii hala xiro ninkaan waa reer Muqdisho maxaa halkaan
keenay wararkeena ayuu rabaa inuu qaado kadiba caay u
badalo iyo wax shacabka Somaliland iska horkeenaya"
ayuu yiri Wariye Xadiis.
Si kastaba ha ahaatee, Xadiis Maxamed Xadiis oo ahaa
Weriyahii Wargeyska Jamhuuriya u fadhiyay Muqdisho mudo ka
badan todobo sanana ku noolaa Somaliland ayaan la ogayn
sababta ay ku maagayaan ragga sheeganaya Masuuliyadda
Somaliland laakiin marka dhan kale laga eego shacabka
Jamhuuriyadda Somaliland iyo siyaasiyiintooda ma necba
shacabka reer koofureed gaar ahaan goboladda dhexe iyo
Muqdisho,waxaana Hargeysa ku nool kumanaan kun oo ka mida
dadkii ka barakacay Muqdisho.
Daawo
Barnaamij gaara oo xiisa badan
Xasuusta Marxuum Axmed Nuur Jaangoow iyo laxamadiisa
Heesta Dhaxalsuge Maxamed Aadan Shamuuri MP3
Halkaan ka dhageyso Warbixinta Weriye Xasan Cadde
