Guddiga Ra'iisul Wasaare Maxamed Xuseen Rooble uu u xilsaaray ka saarista Guddiga Doorashooyinka heer Federaal & heer Dowlad-Goboleed ee lagu eedeeyay in ay katirsan yihiin Hay'adda Nabadsugidda iyo sirdoonka qaranka NISA, Madaxtooyada & shaqsiyaad caadeystay taageero u muujinta madaxda muddo xileedkoodu dhammaaday. Eng Cabdullaahi Abuukar Xaaj (Cabdullaahi Carab) Wasiirka Waxbarashada XFS ahna Guddoomiyaha Guddiga Ra'iisul Wasaare Rooble howshaan u xilsaaray waxa uu sheegay in 34-ruux ay ka dhex heleen 67-da qof ee cabashada laga gudbiyay.

Guddoomiye Cabdullaahi waxa uu sheegay in ay ka fiiriyeen dhinacyo kala duwan oo ku qotontay qiimeyntooda isla markaana shaandheynta ay sameeyeen ku heleen 34-taas xubnood oo ka kala yimid Dowlad-Goboleedyada & Xafiiska Ra’iisul Wasaaraha.

"3-dii June 2021 oo aan la wareegnay cabashada Xubnaha Guddiga 67-da xubnood waxa aan ku sameynay baaris iyo hubin waxaana kasoo dhex saarnay 34-ruux oo aan dhameystirneen hannaankooda shuruudaha Guddiga waxa ay ka kala yimaadeen Dowlad-Goboleedyada iyo xafiiska Ra’iisul Wasaaraha oo qaarkood laga soo magacaabay, dib ayaan ugu celinay meelihii laga soo magacaabay si loosoo badalo 48-saac (labo cishe)” Sidaasi waxaa yiri Guddoomiyaha Guddiga uu magacaabay RW Rooble.

Cabdiraxmaan Al-Cadaala, Wasiir ku xigeenka Wasaaradda Warfaafinta XFS ahna Afhayeenka Guddiga Ra’iisul Wasaaraha ayaa Warbaahinta u sheegay in xubnahaan ay ka kala yimaadeen Dowlad-Goboleedyada Hir-Shabeelle, Galmudug, Koofur Galbeed, Puntland, Somaliland & Beelaha Banaadiriga ah.

"34-taas Xubnood waxa ay kala ahaayeen 11-xubnood oo ah Guddiga maamulka Doorashooyinka heer federaal FIAT, 3-xubnood oo ah xalinta Khilaafaadka, 7-xubnood oo ah Guddiga maamulka Doorashooyinka heer Dowlad-Goboleed ee Somaliland, 5-xubnood heer DG Galmudug, 3-xubnood koofur galbeed, 2-xubnood HirShabeelle, 5-Banaadiriga ah 1-xubin Puntland, Jubbaland oo badashay xubno geeriyooday iyo kuwo tabasho laga keenay, 3-xubnood oo Somaliland kasoo jeeda oo tabasho laga keenay balse ay kawada hadlayaan Ra’iisul Wasaaraha, ku xigeenkiisa & Guddoomiyaha Aqalka sare” Sida uu sheegay Al-Cadaala.

Heshiiskii dhacay 27-kii May 2021 waxa uu albaabada u furay in muddo 60-cishe ah dalka ay uga dhacdo doorashooyin ay ku heshiiyeen Ra’iisul Wasaare Rooble, Madaxda Dowlad-Goboleedyada & Guddoomiyaha Gobolka Banaadir.