Dalalka ay si gaar ah u beegsadeen waxaa ka mid ah Mareykanka, Talyaaniga, Jarmalka, Ireland, Spain, iyo Boqortooyada Midowday (UK). Intooda badan waxay magangalyo siyaasadeed ka dalbadeen dalalka Talyaaniga, Faransiiska iyo Jarmalka, iyagoo adeegsanaya magacyo been abuur ah iyo qabiillo aysan u dhalan si ay uga baxsadaan xaqiiqada dhabta ah ee taariikhdooda.

Wariyeyaasha Waagacusub ayaa helay caddaymo muujinaya in rag horey uga tirsanaa kooxaha argagixisada ay si sharci-darro ah isaga dhiibeen qaar ka mid ah dalalka Yurub. Dhanka Mareykanka, dadka intooda badan ee la ogaaday waxay yihiin burcad-badeed horey uga howlgali jiray Koonfurta Soomaaliya.

Talyaaniga ayaa horey u ahaan jiray waddada ugu weyn ee ay kooxahan uga soo galaan Yurub, balse hadda waddada Spain ayaa noqotay marinka ugu badan ee ay Soomaalidu ku galaan qaaradda, halkaasoo kumaanaan tahriibayaal ah lagu khiyaamay lagana dhacay lacag badan, gaar ahaan gudaha Algeria.

"Waxaan la noolaa nin ka tirsanaa argagixisada Soomaaliya oo la yiraahdo Abdulkadir Olad Farah xilli aan kaam ku wadaagnay Talyaaniga,” ayuu yiri Mohamed Abdi Nur oo la hadlay Waagacusub Media.

Baaritaan ay sameysay Waagacusub Media ayaa lagu ogaaday in Abdulkadir Olad uu ku dhiibtay afar magac oo kala duwan dalalka Talyaaniga, Faransiiska iyo Jarmalka, sida ku cad dukumiinti rasmi ah oo diidmo ah oo uu ka helay Faransiiska.

Sidoo kale, Abdulkadir Olad waxaa lagu eedeeyay inuu ahaa ninkii gacantiisa ku toogtay Wariye Katherine Mary Peyton, oo ka tirsanayd BBC World Service, taasoo lagu dilay albaabka hore ee Hotel Sahafi ee magaalada Muqdisho 9-kii Febraayo 2005.

Waxaa jira saraakiil kale oo Al-Shabaab ka tirsanaa oo si qarsoodi ah ugu milmay tahriibayaal tegey Algeria. Dhibaatooyinkaasi waxay horseedeen in kumanaan kun oo tahriibayaal ah lagu khiyaaneeyo oo laga dhaco lacag badan. Waxaana dadkaasi lacagtooda dhacay muqalaskii caanka ahaa ee la oran jiray Abdirizak Mohamed Aden, oo loo yaqaanno Qaasim.

Waagacusub Media waxay heshay dukumiintiyo, muuqaallo iyo codad la duubay oo caddeynaya in Abdirizak Mohamed Aden uu tahriibayaasha ka qaaday boqolaal kun oo doollar, taasoo si toos ah loogu shubay akoonkiisa ku yaalla Soomaaliya.

Warbixintu sidoo kale waxay daaha ka qaadayaa in nin la yiraahdo Aweys, oo horey uga tirsanaa Al-Shabaab una guuray Netherlands halkaasoo uu ka helay dhalasho, uu markii dambe u guuray London isla markaana uu isku dayay weerar argagixiso oo uu ka geysto UK.

Dhanka kale, magaalada Hamburg ee Jarmalka waxaa muddo dheer ku sugnaa sarkaalkii afduubay markabkii MV Iceberg 1, oo lagu magacaabo Abdirizak Ayub, loona yaqaanno Captain Ayub.

Xog Dheeraad ah: Afduubkii Markabka MV Iceberg 1

Markabka MV Iceberg 1, oo ah Ro-Ro cargo ship calankiisuna ahaa Panama, ayna leedahay shirkadda Azal Shipping oo fadhigeedu yahay Dubai, ayaa la afduubay 29-kii Maarso 2010, meel u jirta qiyaastii 10 mayl badda u jirta magaalada Aden, Yemen.

Markabkan oo siday qalab farsamo oo loogu talagalay shirkadda Aggreko, waxaa weeraray burcad-badeed Soomaali ah oo isticmaalayay saanado dagaal sida RPG iyo jaranjarooyin, waxaana markiiba is dhiibay shaqaalihii markabka kadib rasaas ka dhacday goobta.

Markabka waxaa loo jiiday deegaanka Garacad ee Soomaaliya, halkaasoo lagu hayay xaalad adag oo bani'aadannimo muddo 2 sano iyo 9 bilood, taasoo ka dhigtay markabkii ugu muddada dheeraa ee ay hayaan burcad-badeed Soomaali ah.